თუ ჯერ კიდევ არ იცით, გეტყვით, რომ ყველაზე პოპულარული ქართული სერიალი, ჩემი ცოლის დაქალები, მე-14 სეზონით 5 ოქტომბერს დაბრუნდება.

როგორც სერიალის პროდიუსერი, ირაკლი საღინაძე ამბობს, ახალი სეზონი, რომელიც 52 სერიისგან შედგება, ნაცნობ პერსონაჟებს განსხვავებული კუთხით დაგვანახებს.

განსხვავებული იქნება სერიალის სტილისტიკაც. ახალი სეზონი, წინასთან შედარებით, მეტად ორიენტირებული იქნება ადამიანურ ისტორიებზე.

რამდენიმე დღის ახალი სეზონის პირველი პრომო გავრცელდა:

როგორც ხედავთ, სულ რაღაც 1-წუთიან ტიზერში უამრავი თემაა ჩატეული.

წარმოგიდგენთ 5 შეკითხვას, რომელიც ჩემი ცოლის დაქალების ახალმა პრომომ გაგვიჩინა:

1. რა ხდება ნინას თავს?

თუ წინა სეზონი არც ისე კარგად გახსოვთ, გეტყვით, რომ ნინა და დათო კიდევ ერთი შვილის გაჩენაზე ფიქრობენ. ამის მიზეზი კი პრეზიდენტის ინიციატივაა, რომლის მიხედვითაც ისინი ყოველ მომდევნო შვილზე 100 ათას ლარს მიიღებენ. მიუხედავად მრავალი მცდელობისა, ნინა დაფეხმძიმებას ვერ ახერხებს და ამას მე-13 სეზონში რამდენჯერმე გაესვა ხაზი. ნინას წუხილი ამ თემასთან დაკავშირებით ისმის ახალ პრომოშიც, რომლის პირველი კადრიც სწორედ ნინათი იწყება, სადაც ის თეთრ ფონზე საკმაოდ შეწუხებული სახით ზის, ამას მოსდევს მისი და დათოს კადრიც. ჩვენი ვარაუდით, ნინას ჯანმრთელობასთან დაკავშირებული პრობლემა აქვს.

2. ჩიკა მოკვდა?

შეუძლებელია, ამ სერიალის მაყურებელს დავიწყებოდა, რომ ჩიკამ და მისმა დედამთილმა, რუსამ შავლეგიკოს დეპრესიიდან გამოსაყვანად გადაწყვიტეს მისი "გრძნობებით ეთამაშათ". მათი პროვოკაციული გეგმა კი ჩიკას დაჭრით დასრულდა. ახალ პრომოში შავლეგო ისევ ფსიქოლოგთან ზის და ამბობს - "ცაშიც ხო სულებია არა?!"

3. ვნახავთ თუ არა ლუნას ისტორიებს ციხეში თუ მალევე გამოვა?

როგორც წესი, პოლიტიკოსებს კარგად ეხერხებათ ტყუილების მოგონება და შემდეგ ამაზე მთელი ისტორიის აგება. წინა სეზონში პოლიტიკური თამაშების მსხვერპლი ლუნა მაზიაშვილი აღმოჩნდა, რომელმაც ფანოღის მომღერალი პრეზიდენტი ტყუილში გამოიჭირა, ამისთვის კი ციხე დაიმსახურა.

4. ვინ დაუტოვა ბავშვი ნუნუკას?

წინა სეზონში ნუნუკას დიდი გამოწვევები ხვდა წილად და თამამად შეიძლება ითქვას, რომ ყველა მათგანს იდეალურად გაართვა თავი. თუმცა წინ კიდევ ერთი გამოწვევა აქვს - კართან დატოვებული ბავშვი, რომელზე მზრუნველობაც მისთვის სავარაუდოდ სეზონის მთავარი გამოწვევა იქნება.

5. მართლა 23:00 საათზე დაიწყება?

ჰმ... ამის გარანტიას ვერავინ მოგვცემს, მაგრამ შეგვიძლია ზუსტად 23:00-ზე მივუსხდეთ ეკრანებს სასურველი ინტროს გაგონების მოლოდინში და თავად გადავამოწმოთ.