ერთ-ერთი მთავარი მიზეზი, რის გამოც საქართველოს მოქალაქეები ელექტრომობილების შეძენისგან თავს იკავებენ, შესაბამისი ინფრასტრუქტურის არარსებობაა. განსაკუთრებულ პრობლემად, ყოველთვის, შორ მანძილზე, განსაკუთრებით კი დასავლეთის მიმართულებით გადაადგილება სახელდებოდა.

მიუხედავად ამისა, ქვეყანაში ელექტრომობილების რაოდენობა მაინც სწრაფად იზრდება. დღეს საქართველოს მასშტაბით 5000-მდე ასეთი მანქანა მოძრაობს და, როგორც გაირკვა, დასავლეთის გზასაც უპრობლემოდ შეუძლიათ გაუყვნენ.

კომპანია სოკარს საქართველოს მასშტაბით ელექტრომობილებისთვის ჯამში 8 დამტენი აქვს. ორი თბილისში, ერთი ბათუმში, ერთი ქუთაისში, ასევე სოფელ ურბნისში, კახეთში, რუსთავსა და მარტყოფშიც.

იმის დასამტკიცებლად, რომ თბილისიდან ბათუმამდე ელექტრომობილით წასვლის შემთხვევაში პრობლემა არ შეგექმნებათ, კომპანია სოკარმა ჟურნალისტებისთვის მწვანე ტური მოაწყო. თბილისიდან სრულად დამუხტული ორი ელექტრომობილი - Hyundai Ionic და Tesla Model S პირველად გორში, სოკარის ავტოგასამართ სადგურზე გაჩერდა. სწორედ აქ არის დამონტაჟებული სწრაფი დამტენი. 30-45 წუთი, რაც რეალურად ავტომობილების დამუხტვას სჭირდება, შეგიძლიათ იქვე ყავის დასალევად და სასაუზმოდ გამოიყენოთ.

შემდეგი გაჩერება ქუთაისშია. ადგილზე არსებულ სოკარის ავტოგასამართ სადგურს სწრაფი დამტენი მალე დაემატება. მანამდე კი ამ ქალაქში გაჩერება 1-1,5 საათი მოგიწევთ. ქუთაისში სრულად დამუხტული მანქანა ბათუმამდე შეფერხების გარეშე ჩაგიყვანთ.

ელექტრომობილების წახალისება და პოპულარიზაცია კომპანია სოკარის კორპორაციული სოციალური პასუხისმგებლობის პროექტის ერთ-ერთი ნაწილია. სოკარ პეტროლიუმ ჯორჯიას დირექტორი, ლევან გიორგაძე აცხადებს, რომ კომპანიის მიზანი არ არის მომხმარებლისთვის მხოლოდ საწვავის მიწოდება. მისი თქმით, სოკარის ავტოგასამართი სადგურები მძღოლების ყველანაირ საჭირო სერვისს სთავაზობს.

ფოტო: სოკარი

"გარდაუვალია ამ ინდუსტრიის ფართო განვითარება. დღეს ავტომობილების დიდი ნაწილი შიდა წვის ძრავზეა, სულ მალე ხალხი ალტერნატიულ საწვავის მქონე მანქანებზე გადავა და ეს, დიდი ალბათობით, იქნება სწორედ ელექტრომობილი. ჩვენ არ ვართ საწვავის კომპანია, ჩვენ ვართ ავტოგასამართი სადგურების ქსელი. ჩვენ ვართ მძღოლების მეგობარი გზაზე, შესაბამისად, ყველანაირი ტრანსპორტის მომსახურება უნდა შეგვეძლოს. მათ შორის, ელექტროსკუტერებისაც. მალე, პარტნიორებთან ერთად ელექტროსკუტერების ელემენტებსაც დავაყენებთ. ამ მიმართულებას წავახალისებთ. რაც მეტი ელექტრომობილი იქნება, მით უფრო მალე მოწესრიგდება ეკოლოგიაც და ჰაერი სუფთა იქნება", - აცხადებს ლევან გიორგაძე.

კომპანია სოკარს საქართველოს მასშტაბით ელექტრომობილებისთვის ჯამში 8 დამტენი აქვს. ორი თბილისში, ერთი ბათუმში, ერთი ქუთაისში, ასევე სოფელ ურბნისში, კახეთში, რუსთავსა და მარტყოფშიც. თუმცა, კომპანია უახლოეს მომავალში მათი რაოდენობის გაზრდას გეგმავს. ასე რომ, ელექტრომობილების მძღოლებს გადაადგილება არა მხოლოდ დასავლეთით, არამედ - აღმოსავლეთითაც შეუძლიათ.

ელექტრომობილების პოპულარიზაციის გარდა, სოკარის კორპორაციული სოციალური პასუხისმგებლობის პროექტში სხვა მიმართულებებიც შედის. პასუხისმგებლობის 5 სტანდარტის ფარგლებში კომპანიამ გარემოს დაცვის, ახალგაზრდების მხარდაჭერის, უსაფრთხოების, ქალთა გაძლიერებისა და შშმ პირების მხარდაჭერისათვის არაერთი პროექტი განახორციელა და უახლოესი მომავლისათვის ახალი აქტივობებიც დაგეგმა. სოკარის კორპორაციული სოციალური პასუხისმგებლობის ერთ-ერთი პრინციპი გამჭვირვალობაა, რაც გულისხმობს ინფორმაციაზე ხელმისაწვდომობის უზრუნველყოფას. კომპანია ყოველწლიურად მოამზადებს CSR ანგარიშს, სადაც იქნება ასახული ყველა მონაცემი და ინფორმაცია წლის აქტივობებისა და სამომავლო გეგმების შესახებ.