2000 წელს რეჟისორმა ტერი გილიამმა ამბიციური პროექტი დაიწყო, აპირებდა გადაეღო ფილმი რომელიც მიგელ დე სერვანტესის რომანის დონ კიხოტის ყველაზე მასშტაბური ეკრანიზაცია იქნებოდა. საბოლოოდ ფილმი 17-წლიანი პაუზის შემდეგ დასრულდა.

ფილმის იდეა რეჟისორს 1980-იან წლებში გაუჩნდა, თუმცა მისი გადაღებები მხოლოდ 2000 წელს დაიწყო. როგორც თავად ამბობს, პროცესში უამრავი პრობლემა შეექმნა, ფინანსურ პრობლემებს ემატებოდა მთავარი როლის შემსრულებელი მსახიობები, რომლებიც ხშირად ტოვებდნენ პროექტს და ყველაფრის თავიდან დაწყება ხდებოდა საჭირო.

გადაღებები ხუთ ქვეყანაში - დიდ ბრიტანეთში, ესპანეთში, საფრანგეთში, პორტუგალიასა და ბელგიაში მიმდინარეობდა.

ფილმმა ბევრი მსახიობი გამოიცვალა, მათ შორის იყვნენ - ჯონ ჰარტი, ჯონი დეპი, ვანესა პარადისი, ჯეიკ ოკონელი, ჟერარ დეპარდიე და იუენ მაკგრეგორი.

საბოლოოდ მთავარი როლები ადამ დრაივერმა, როზი დე პალმამ, ოლგა კურილენკომ და ჯონათან პრაისმა მიიღეს.

თუმცა გეტყვით იმასაც, რომ რეჟისორმა ტერი გილიამმა სასამართლო პროცესი წააგო და ფილმზე საავტორო უფლებები ჩამოერთცა.

გადაწყვეტილება პარიზის სააპელაციო სასმართლომ აღიარა და ფილმზე უფლებები საპროდიუსერო კომპანია Alfama Films-სა და მის მფლობელ, პაოლო ბრანკოს მიაკუთვნა.

ფილმის საავტორო უფლებებზე დავა ჯერ კიდევ 2016 წელს დაიწყო და ამ გადაწყვეტილების მიხედვით, ფილმზე უფლებების დაკარგვის გარდა, ტერი გილიამს ბრანკოს კომპანიისთვის 10 ათასი ევროს გადახდაც მოუწევს.

კაცი, რომელმაც დონ კიხოტი მოკლა კანის კინოფესტივალის დახურვის ფილმი იყო. თუმცა ფესტივალის მსვლელობის დროს გაურკვეველი იყო გავიდოდა თუ არა კინოსურათი კანში, საბოლოოდ მხარეებმა შეთანხმებას მიაღწიეს, თუმცა შემდეგ დავა განახლდა.

ფილმის პრემიერა საქართველოში 27 სექტემბერს შედგება.