ქარიშხალ ფლორენსის ნაწილმა ჩრდილოეთ კაროლინას უკვე მიაღწია, რამაც სანაპიროზე ძლიერი ქარი და წვიმა გამოიწვია. მეტეოროლოგების ვარაუდით ქარიშხალმა შესაძლოა ზარალი 10 მილიონამდე ადამიანს მიაყენოს.

რამდენიმე საათის წინ ფლორენსის სიჩქარე 225 კმ/სთ-დან 170 კმ/სთ-მდე შემცირდა, რამაც ქარიშხალი კატეგორია 4-დან 2-მდე ჩამოაქვეითა. თუმცა მეტეოროლოგები ამბობენ, რომ შტორმი შესაძლოა ამერიკის სანაპიროზე დიდი ხნის განმავლობაში გაჩერდეს, რაც სანაპიროს დატბორვასა და კოკისპირულ წვიმებს გამოიწვევს.

ჩრდილოეთ კაროლინის მთავრობის წარმომადგენლები აცხადებენ, რომ ქარის სიჩქარის შემცირების მიუხედავად შტორმი მაინც წარმოუდგენლად ძლიერია და მას აქვს პოტენციალი, რომ შტატს კოლოსალური ზარალი მიაყენოს.

ამერიკის შეერთებული შტატების ქარიშხლების ეროვნულმა ცენტრმა განაცხადა, რომ ქარიშხლის ცენტრი ჩრდილოეთისა და სამხრეთ კაროლინის სანაპიროებს დღის მეორე ნახევარში მიაღწევს.

ფოტო: NATIONAL WEATHER SERVICE

პროგნოზის მიხედვით ქარიშხლის ტრაექტორიაში ჯორჯიის შტატიც ხვდება, ყველა ნახსენებ შტატში ამ დროისთვის საგანგებო ვითარებაა გამოცხადებული.

"რაც უფრო დიდია ქარიშხალი და რაც უფრო ნელა მოძრაობს ის, მით უფრო მეტი ზარალის მოყენება შეუძლია მას," - აცხადებენ მეცნიერები.

ფლორენსს პრეზიდენტი ტრამპი თავის ტვიტში გამოეხმაურა, რომელშიც ხალხს სიფრთხილისკენ მოუწოდა და განაცხადა, რომ მთავრობა ქარიშხლის დასახვედრად მზად არის.