შეიძლება ცოტა უცნაურად გამოიყურებოდეს, მაგრამ ეს ჩვენი გალაქტიკის ცენტრში არსებული სუპერმასიური შავი ხვრელის აქამდე ყველაზე მკაფიო სურათია, რაც კი მეცნიერებს გადაუღიათ.

ფოტო: SOUTH AFRICAN RADIO ASTRONOMY OBSERVATORY

ეს სურათი სამხრეთ აფრიკის რადიოასტრონომიის ობსერვატორიის 64 სხვადასხვა ტელესკოპის გამოყენებით არის შექმნილი. ეს ტელესკოპები ხილული სინათლის ნაცვლად სამყაროდან წამოსულ რადიო სიგნალებს აგროვებენ. ამ შემთხვევაში კი ისინი ჩვენი გალაქტიკის ცენტრში არსებული სუპერმასიური შავი ხვრელის გადასაღებად გამოიყენეს.

სურათში ჩანს შავ ხვრელთან არსებული გრძელი ძაფის მაგვარი სტრუქტურები, რომლებიც გალაქტიკაში სხვაგან არსად გვხვდება. ისინი პირველად 1980 წელს აღმოაჩინეს და მეცნიერებმა კვლავ არ იციან, თუ როგორ ხდება მათი წარმოშობა.

მათ სურათით რადიო ობსერვატორიის შესაძლებლობები გამოსცადეს. ობსერვატორია სრული დატვირთვით ახლახანს ამუშავდა, როდესაც მისი 64-ვე ანტენა ჩართეს. თითოეული ანტენის დიამეტრი დაახლოებით 14 მეტრია.

ჩვენი გალაქტიკის სუპერმასიური შავი ხვრელის შესწავლა ხილული სინათლის სპექტრით რთულია, რადგან ის სქელი მტვრისა და გაზის ღრუბლებშია ჩაფლული. თუმცა, რადიო ტელესკოპების გამოყენებით ჩვენ შეგვიძლია ამ გაზსა და ღრუბელში გავიხედოთ.

სურათზე გალაქტიკის ცენტრი შუა, ყველაზე ნათელ წერტილშია მოთავსებული. მკვლევარების თქმით გალაქტიკის ცენტრი ერთ-ერთი ყველაზე საინტერესო და ამავდროულად რთულად გადასაღები რეგიონია. ისინი იმედოვნებენ, რომ ტელესკოპების ოპტიმიზაციის შემდეგ ისინი უკეთესი სურათების მიღებასაც შეძლებენ.