საბრძოლო ხელოვნების ოსტატმა, ვიქტორ ლიალკომ დაწერა წიგნი, რომელშიც აღწერილია ის ყველაზე ეფექტიანი მეთოდები, რომლებიც ქალებს თავდასხმის შემთხვევაში თავდაცვაში დაეხმარებათ.

აღნიშნულ წიგნზე დაყრდნობით, ილუსტრატორმა თავდაცვის ყველაზე მარტივი და ეფექტიანი გზები დახატა. მათი გამოყენება კი ყველა ქალს შეუძლია, საჭიროების შემთხვევაში, იმის მიუხედავად, რამდენად დიდი ან მძიმეა თავდამსხმელი.

1. დასაწყისში, მნიშვნელოვანია ყველაზე მტკივნეული ადგილების დამახსოვრება

არ აქვს მნიშვნელობა თავდამსხმელის ზომას, რადგან ყველაზე მტკივნეული წერტილების ცოდნის შემთხვევაში დარტყმა შეგიძლიათ.

2. ყველაზე მარტივი და ყველაზე ეფექტიანი მოძრაობები

თუ თავდამსხმელს სურათზე აღნიშნულ ორ-ორ თითს საწინააღმდეგო მიმართულებით გადაუგრიხავთ, ის მუხლებზე დაეცემა. თუ ხელზე ვერ მიწვდებით, მუშტით ან თითებით ლავიწის ძვლებს შორის დარტყმით მას ორიენტაციას დაურღვევთ და გონზე მოსასვლელად მას დრო დასჭირდება.

ერთ-ერთი ყველაზე მტკივნეული ნაწილი საზარდულია. ამით შეიძლება თავდამსხმელის რამდენიმე-წამიანი პარალიზებაც შეძლოთ, რაც გასაქცევად საკმარის დროს მოგცემთ.

3. თუ წინიდან დაგიჭერენ

თუ წინიდან დაგიჭერენ, ხელების აწევას ზედა რჩევების განსახორციელებლად ვეღარ შეძლებთ, ამიტომ მხრები და ხელები უბრალოდ წინ გამოწიეთ, რაც თქვენსა და თავდამსხმელს შორის სივრცეს გააჩენს. ამის შემდეგ, მიზანში მისი ცხვირი ამოიღეთ და თავით დაარტყით, რის შემდეგაც ის მომენტალურად უკან დაიხევს. ამის შემდეგ კი საზარდულში მუხლის თავით ამოარტყით.

თუ თქვენსა და თავდამსხმელს შორის კვლავ არის გარკვეული სივრცე, მაშინ თქვენი ხელის გულის გამოყენებით შეგიძლიათ მისი მოგერიება. გაჭიმეთ მარცხენა მკლავი და მას ჯერ ნიკაპსა და ცხვირზე მეორე ხელის გულით დაარტყით, შემდეგ კი საზარდულში - მუხლით. ეს მას მოძრაობის უნარს რამდენიმე წამით წაართმევს.

4. როგორ გაითავისუფლოთ ხელები

თუ თავდამსხმელი თქვენს ხელის მაჯას ჩაეჭიდება, ცერა თითის წესი გაიხსენეთ და თქვენი მკლავი თავდამსხმელის ცერა თითის მიმართულებით გადაატრიალეთ.

თუმცა, თუ მას თქვენი ხელი მჭიდროდ უჭირავს, მაშინ მაჯა ცერა თითისკენ გადახარეთ და როდესაც მისი მკლავის ქვეშ მოაქცევთ, მაქსიმალური სიძლიერით გამოქაჩეთ.

5. თუ ზურგიდან დაგიჭერენ

თავდამსხმელები მსხვერპლს ხშრად ზურგიდან ეპარებიან, რადგან ეს ყველაზე მარტივი გზაა მკლავების გასაკავებლად, რათა მათი გამოყენება ვეღარ შეძლონ.

თავის გასათავისუფლებლად, სწრაფად გადაიხარეთ უკან და ეცადეთ, რომ თავდამსხმელს თქვენი თავის უკანა ნაწილით დაარტყათ. ამ დროს, თავდამსხმელი ცალ ფეხს წინ წევს, ამ დროს კი სწრაფად დაიხარეთ დაბლა, ჩასჭიდეთ ხელი მის ფეხს და თქვენკენ მოქაჩეთ. ამ დროს თავდამსხმელი წონასწორობას დაკარგავს და აუცილებლად დაეცემა.

6. თუ თქვენს დაჭერას გვერდიდან ეცდებიან

ამ დროს ყველაზე ძლიერი დარტყმის საშუალება გეძლევათ, რადგან იდაყვი თავდამსხმელის წინააღმდეგ ერთ-ერთი ყველაზე მტკივნეული "იარაღია".

დაარტყით თავდამსხმელს საფეთქელზე, ყბაში ან ცხვირზე. ამის შემდეგ, ის უკან დაიხევს, რის შემდეგაც მის მუცელში ან გულ-მკერდზე დარტყმას შეძლებთ.

7. თუ კედლის წინ დაგიჭერენ

ხშირად თავდამსხმელები მსხვერპლს კუთხეში, კედელთან მიიმწყვდევენ. ამ სიტუაციაში, მნიშვნელოვანია გახსოვდეთ, რომ წინააღმდეგობის გაწევა და მისი სუსტი წერტილების მიზანში ამოღება თქვენს მდგომარეობაზეა დამოკიდებული.

• თუ თავდამსხმელის ორივე მკლავი აწეულია, გაშლილი ხელის გულით იღლიაში დაარტყით.
• თუ თქვენი მკლავიდან ერთი ქვემოთაა, მაშინ მის მკერდზე, ყბაში და კისერზე დარტყმა შეგიძლიათ.
• თუმცა ამ დროს ყველაზე ეფექტიანი იერიში საკუთარი თავით შეგიძლიათ განახორციელოთ. დაიხარეთ ოდნავ, შემდეგ სწრაფად შეხტით და თავით ყბაში დაარტყით. ეს მოძრაობა მას მაშინვე დააკარგვინებს ორიენტაციას და სიტუაციიდან თავის დახსნის შანსს მოგცემთ.

იმედი გვაქვს, ამ საბრძოლო ხერხების გამოყენება არასდროს მოგიწევთ, მაგრამ თუ საფრთხეში აღმოჩნდებით, იცოდეთ როგორ დაიცვათ თავი და გახსოვდეთ მტკივნეული წერტილები.

მსოფლიო ჯანდაცვის ორგანიზაციის სტატისტიკის მიხედვით, ყოველი 3 ქალიდან ერთს (35%) თავისი ცხოვრების განმავლობაში გამოუცდია ფიზიკური ან/და სექსუალური ძალადობა პარტნიორის, ან არა პარტნიორის მხრიდან.