საქართველოს სახალხო დამცველის აპარატის ინფორმაციით, 12 მარტს, ვალეში მდებარე სალოცავის გვერდით, დაუდგენელმა პირმა (პირებმა) დაწვეს კათოლიკური ლიტერატურა და ხატები. ომბუდსმენი გმობს ამ ვანდალურ ფაქტს და მომხდარის დროულ გამოძიებას ითხოვს. ამის შესახებ სახალხო დამცველის მიერ გავრცელებულ განცხადებაშია ნათქვამი.

კათოლიკური სიწმინდეების განადგურებასთან დაკავშირებით, სახალხო დამცველის წარმომადგენელი ქალაქ ვალეში ჩავიდა, სადაც ადგილობრივი რელიგიური გაერთიანებების წინამძღვრებს შეხვდა.

"სამწუხაროდ, არაერთი შემთხვევა ყოფილა რელიგიურ ნაგებობაზე თავდასხმისა და შეურაცხყოფის. მსგავს ფაქტებს განსაკუთრებით, ადგილი აქვს უმცირესობების წინააღმდეგ", - ვკითხულობთ განცხადებაში.

მომხდარ ფაქტს გამოეხმაურნენ კათოლიკე ეკლესიის ეპისკოპოსი ჯუზეპე პაზოტო და ახალციხისა და ტაო-კლარჯეთის მიტროპოლიტი თეოდორე ჭუაძე. მათ დაგმეს მომხდარი ვანდალური ფაქტი და ისაუბრეს გამოძიების აუცილებლობაზე.

ცნობილია, რომ აღნიშნული სალოცავით სარგებლობენ როგორც მართლმადიდებლები, ისე კათოლიკეები.

გამოძიება მიმდინარეობს სისხლის სამართლის კოდექსის 166-ე მუხლით, რაც რელიგიური გაერთიანების საქმიანობისათვის ხელის შეშლას გულისხმობს.