სად გაქრა ამელია ერჰარტი? - ამ კითხვაზე მეცნიერები წლებია პასუხს ეძებენ, თუმცა უტყუარი მტკიცებულება ჯერჯერობით ისევ არ არსებობს. ეს რეალობა შესაძლოა სულ მალე შეიცვალოს. ანთროპოლოგიის პროფესორი რიჩარდ იანცი ამბობს, რომ 1940 წელს ნიკუმაროროს კუნძულზე აღმოჩენილი ძვლები, შესაძლოა ამელია ერჰარტს ეკუთვნოდეს.

თავის ნაშრომში, რომელიც ჟურნალ Forensic Anthropology-ში გამოქვეყნდა, რიჩარდ იანცი წერს, რომ როდესაც ძვლები აღმოაჩინეს, არსებობდა ვარაუდი, რომ ის ერჰარტს ეკუთვნოდა, თუმცა 1941 წელს, ფიჯიში ჩატარებული ექსპერტიზით დამტკიცდა, რომ ის [ძვლები] კაცს ეკუთვნოდა.

ამ დასკვნას მეცნიერი ეჭვქვეშ აყენებს.

"ოსტეოლოგია (ძვლების აგებულების შემსწავლელი მეცნიერება) იმ დროისთვის არ იყო კარგად განვითარებული", - წერს რიჩარდ იანცი.

მას შემდეგ აღმოჩენილი ძვლები დაიკარგა, თუმცა თანამედროვე ტექნოლოგიების დახმარებისა და იანცის გათვლებით, მეცნიერი ფიქრობს, რომ ერჰარტის აგებულება უფრო მეტად შეესაბამება კუნძულზე აღმოჩენილ ძვლებს, ვიდრე სხვა სავარაუდო ინდივიდუალების 99%-ს. იანცის თქმით, ნიკუმაროროზე აღმოჩენილი ძვლების შემთხვევაში, დოკუმენტურად დადასტურებული ერთადერთი კანდიდატი, ვისაც შეიძლება ძვლები ეკუთვნოდეს, ამელია ერჰარტია.

"თუკი დადასტურდება, რომ ეს ძვლები ამელია ერჰარტს ეკუთვნის, უნდა ვივარაუდოთ, რომ ის კუნძულზე მარტოობაში გარდაიცვალა", - ამბობს რიჩარდ იანცი.

ამელია ერჰარტი მის თვითმფრინავთან, "კოლუმბუსთან" ერთად, რომლითაც ატლანტის ოკეანეს გადაუფრინა

ამელია ერჰარტი მის თვითმფრინავთან, "კოლუმბუსთან" ერთად, რომლითაც ატლანტის ოკეანეს გადაუფრინა

ფოტო: Topical Press Agency

ამელია ერჰარტი პირველი ქალი პილოტი იყო, რომელმაც 1932 წელს სოლო გაფრენა შეასრულა და ატლანტის ოკეანეს გადაუფრინა. გარდა პილოტობისა, ერჰარტი ცნობილი ამერიკელი მწერალი იყო, რომლის სათავგადასავლო ჟანრის ნაწარმოებებიც უდიდესი პოპულარობით სარგებლობა. ერჰარტი გამორჩეული იყო სამოქალაქო აქტივიზმითაც. ის აქტიურად ლობირებდა ქალთა უფლებების თემას და პროპაგანდას უწევდა მეცნერებასა და პოლიტიკაში ქალების როლის ზრდას.

1937 წელს ერჰარტმა მისი ბოლო რეისი შეასრულა. მას შემდეგ ერჰარტი უკვალოდ დაიკარგა და არავინ იცის რა ბედია ეწია მას. ერთი ვერსიით, ერჰარტი იაპონიაში შეიპყრეს, როგორც ამერიკის აგენტი და იქ მოკლეს, თუმცა ეს ინფორმაცია დაუზუსტებელია.