თბილისის მერმა, კახა კალაძემ მთავრობის სხდომაზე განაცხადა, რომ მერიას დაქვემდებარებული ტერიტორიების გამოყენებისა და განაშენიანების რეგულირების საკითხთა საბჭოს, ე.წ. ზონალური საბჭოს გაუქმების ინიციატივით შესაბამის ორგანოებს მიმართავს.

საბჭოს რეკომენდაციების საფუძველზე კონკრეტული განაშენიანების რეგულირების გეგმების დამტკიცებისა და კოეფიციენტების მატებასთან დაკავშირებით, გადაწყვეტილებები მიიღებოდა.

კალაძის თქმით, დედაქალაქის მერიას სტრუქტურული რეფორმა აქვს დაწყებული და პროცესის დასრულებამდე, ე.წ. ზონალური საბჭოს ფუნქციას მერიის შესაბამისი სამსახურები მისი პირადი კონტროლის ქვეშ შეასრულებენ.

"ამასთან დაკავშირებით, რამდენჯერმე ვისაუბრე და გავაკეთე განცხადება, რომელიც რასაკვირველია, ასევე, ურბანული პოლიტიკის მიმართულებას და არქიტექტურის სამსახურის ფუნქციურ გარდაქმნას შეეხება".

თბილისის მერის განცხადებით, ბიუროკრატიის შემცირებისა და ეფექტურობის მიზნით, დავით ნარმანიას დროს შექმნილი 19 კომისია უქმდება.

"ამ მიზნით, ცვლილებები შევა შესაბამის სამართლებრივ აქტებში, ხოლო კონკრეტულ საკითხებზე გადაწყვეტილებებს მერიის შესაბამისი სამსახურები და დაქვემდებარებული უწყებები გაცილებით ნაკლებ დროში და უფრო ეფექტურად მიიღებენ", - განაცხადა კახა კალაძემ.