სტატია შეიცავს სპოილერებს The Testaments-ის ახალი სეზონიდან.

ოთხშაბათს The Testaments-ის პირველი სეზონი დასრულდა. სერიალის შემქმნელების თქმით, ახალი სეზონის სიუჟეტზე მუშაობა უკვე დაწყებულია.

როგორც ბოლო სერიებში ვნახეთ, აგნესისა და დეიზისთვის მთავარი ახლა ერთიანობა და წინააღმდეგობის შენარჩუნებაა — მათ აშკარად გადაწყვეტილი აქვთ, რომ სისტემის წინააღმდეგ არავითარ შემთხვევაში გატყდნენ. Don’t let the bastards grind you down სწორედ ის ფრაზაა, რომელიც ამ განწყობას ყველაზე ზუსტად ასახავს და მათ მოქმედებაშიც აირეკლება.

აგნესი The Testaments-ის ერთ-ერთი მთავარი პერსონაჟია და ახალ სერიალში სწორედ მისი თვალით დანახულ გილეადს ვხედავთ — მკაცრ, კონტროლზე დაფუძნებულ სისტემას, რომელშიც ახალგაზრდების ცხოვრება წინასწარ არის განსაზღვრული. აგნესის მდგომარეობა სრულიად უნიკალურია: მას ელიტურ ქორწინებამდე სულ რამდენიმე ნაბიჯიღა აკლდა და თითქოს "იდეალურ მომავალს" უახლოვდება, მაგრამ მისმა არჩევანმა ყველაფერი შეცვალა. აგნესი ყველაფერს კარგავს და იძულებულია, ცხოვრება ისევ თავიდან დაიწყოს. The Testaments-ის შემქმნელების თქმით, სერიალში სიტუაცია სულ უფრო იძაბება.

"აგნესი ყოველთვის ყველას ფავორიტი იყო, ახლა კი აუტსაიდერად იქცა. ჩვენ გვინდოდა გვეჩვენებინა, რომ ამ სამყაროში სტატუსები მუდმივად იცვლება. გილეადში თუ ერთი ჯგუფიდან მეორეში გადაინაცვლებ, ეს შეიძლება სიცოცხლის ფასადაც კი დაგიჯდეს," — ამბობს სერიალის შემქმნელი, ბრიუს მილერი.

"რამდენჯერაც ფინალში სამი გოგოს დერეფანში სეირნობას ვუყურებ, ყოველთვის მეტირება. ეს ძალიან შთამაგონებელი, ემოციური და ამაღელვებელია. გოგოები უდიდესი საფრთხის წინაშე დგანან, თუმცა, ამავდროულად, ჩვეულებრივი თინეიჯერული საფიქრალი აქვთ — სწორედ ესაა ცხოვრება," — ამბობს სერიალის აღმასრულებელი პროდიუსერი, ელიზაბეტ მოსი.

Variety-სთან ინტერვიუში ბრიუს მილერი აცხადებს, რომ მეორე სეზონზე უკვე მუშაობენ, თუმცა გამოსვლის თარიღი ჯერ უცნობია, რადგან ყველაფერი სხვადასხვა ფაქტორზეა დამოკიდებული. მისი თქმით, მნიშვნელოვანია, რომ სერიალის გადაღებების პროცესი არ აჩქარდეს. ბრიუს მილერისთვის, პრიორიტეტული ხარისხია და არა ნაჩქარევი გადაღებები, რაც, საბოლოო ჯამში, სუსტ შედეგს იძლევა. მილერი ხაზს უსვამს, რომ ნებისმიერი მცირე დეტალის გაუმჯობესებაც კი — სცენარიდან დაწყებული, საერთო ვიზუალური დეტალებით დამთავრებული — საბოლოო ხარისხზე პირდაპირ აისახება.

კითხვაზე — გამოაშკარავდება თუ არა დეიზის ნამდვილი მშობლების ვინაობა მილერი საკმაოდ ბუნდოვნად და ირონიულად პასუხობს. ეს კი იმაზე უნდა მიანიშნებდეს, რომ სერიალში ამ საიდუმლოს ეტაპობრივ, დრამატულ გახსნას გეგმავენ.