"მე ვარ პასუხისმგებელი საკუთარ თავზე", — ასე გამოეხმაურა თბილისის მერი კახა კალაძე სუს-ის მიერ გავრცელებულ ინფორმაციაში უფასო სასადილოებში კორუფციასა და 3.5 მლნ-ზე მეტი ლარის მითვისებაზე. მისი თქმით, 30 000-მდე თანამშრომელი მუშაობს მუნიციპალიტეტის მერიაში და თუ ვინმეს დანაშაული აქვს ჩადენილი, კანონის წინაშე აგებს პასუხს.

"მე ვარ პასუხისმგებელი საკუთარ თავზე. 30 000-მდე თანამშრომელი მუშაობს მუნიციპალიტეტის მერიაში. თუ ვინმეს აქვს დანაშაული ჩადენილი, ან მომავალში გაბედავს, კანონის წინაშე აგებს პასუხს. დღეს ისეთი მოცემულობაა, შეიძლება, საკუთარ შვილზე ვერ აიღო პასუხისმგებლობა. დედაქალაქის მერია არ არის საგამოძიებო უწყება. უწყებებს აქვთ შესაბამისი მიმართულება. ყველა ვალდებულია, თავისი კომპეტენციის ფარგლებში იმოქმედოს", — აღნიშნა კახა კალაძემ.

მისივე განმარტებით, რომ მუნიციპალიტეტის მერიის თანამშრომლები უფასო სასადილოებს სანიტარიული კუთხით აფასებენ, დანარჩენ საკითხებს კონტრაქტორი კომპანიები კურირებს.

"დედაქალაქში 64 უფასო სასადილო გვაქვს. დანაშაულში კონკრეტული კომპანიები გამოვლინდა. პროდუქციის მიღება-ჩაბარება, ბენეფიციართა აღრიცხვა და სხვ. სწორედ კონტრაქტორ კომპანიას ევალება. ეს ხელშეკრულებაშია გაწერილი. თუ გამგეობის თანამშრომლები იყვნენ დანაშაულში შემჩნეულნი, ამას შესაბამისი რეაგირება მოჰყვებოდა -დააკავებდნენ მათ. თუ კონკრეტული კომპანია ან მისი ქვეკონტრაქტორია დამნაშავე, ამას გამოძიება დაადგენს", — განაცხადა კახა კალაძემ.

ცნობისათვის, სუს-ის ინფორმაციით, დაკავებულია 5 პირი, რომლებიც 2023-2026 წლებში, ყოველდღიურად, უფასო სასადილოების 14 451-მდე ბენეფიციარს არაკეთილსინდისიერად ემსახურებოდა და გამგეობებიდან მიღებულ 3 529 000 ლარს თაღლითურად დაეუფლა.

მომხდარს გამოეხმაურა საქართველოს მე-5 პრეზიდენტი სალომე ზურაბიშვილის და მომხდარში პასუხისმგებლობა თბილისის მერს, კახა კალაძეს დააკისრა. ის წერს, რომ "
ნებისმიერ წესიერ ქვეყანაში გადამდგარი იქნებოდა საკუთარი თავის ოდნავ მაინც პატივისმცემელი, ღირსეული ქალაქის თავი!".

"ჯარისკაცების, პატიმრების, ბავშვების კვებიდან მოპარული ფული არ ეყოთ, ახლა მოხუცებს პარავენ ლუკმას უფასო სასადილოებიდან. ანუ მილიონების კეთება სკვერების მოწყობით და გზების დაგებით, მშენებლობებისთვის კოეფიციენტების გაზრდით, ტენდერების თავიანთ ინტერესებზე მორგებით და გაყალბებით თურმე არ გყოფნით. გაუმაძღარნი კიდევ უნდა გამდიდრდეთ ჩვენი ყველაზე დაუცველი მოქალაქეების ხარჯზე!!!

სირცხვილის განცდა არ არსებობს!

არც პასუხისმგებლობის შეგრძნება.

ქალაქის მერი ალბათ კიდევ გვეტყვის, რომ მისი კომპეტენცია არ არის და არაა ვალდებული პასუხი აგოს მის დაქვემდებარებაში არსებულ უწყებებში ჩადენილ დანაშაულზე! არც დაღუპულ ბავშვებზე! არც მოპარულ მილიონებზე! აბა რაზეა პასუხისმგებელი, რას ნიშნავს მერის მანდატი და ხალხის წინაშე ანგარიშის წარდგენის ვალდებულება?

ნებისმიერ წესიერ ქვეყანაში გადამდგარი იქნებოდა საკუთარი თავის ოდნავ მაინც პატივისმცემელი, ღირსეული ქალაქის თავი! მაგრამ სადაა ღირსება? ღირსეული ვერ გაბედავდა ხალხის დაცინვას და წალენჯიხაში ძვირადღირებულ ავტომობილებით რბოლას! თუმცა ამათგან დიდი ხანია არც ღირსებას, არც პასუხისმგებლობას აღარ ველოდებით!", — წერს საქართველოს მე-5 პრეზიდენტი სალომე ზურაბიშვილი.