საქართველოს მე-5 პრეზიდენტი სალომე ზურაბიშვილი სუს-ის მიერ გავრცელებულ ინფორმაციას ეხმაურება, რომლის თანახმადაც 5 პირი დააკავეს, რომლებიც უფასო სასადილოებისთვის გამოყოფილ 3.5 მლნ-ზე მეტ თანხას თაღლითურად დაეუფლნენ. ზურაბიშვილი წერს, რომ ამ დანაშაულზე პასუხისმგებლობა თბილისის მერმა უნდა აიღოს.

"ჯარისკაცების, პატიმრების, ბავშვების კვებიდან მოპარული ფული არ ეყოთ, ახლა მოხუცებს პარავენ ლუკმას უფასო სასადილოებიდან. ანუ მილიონების კეთება სკვერების მოწყობით და გზების დაგებით, მშენებლობებისთვის კოეფიციენტების გაზრდით, ტენდერების თავიანთ ინტერესებზე მორგებით და გაყალბებით თურმე არ გყოფნით. გაუმაძღარნი კიდევ უნდა გამდიდრდეთ ჩვენი ყველაზე დაუცველი მოქალაქეების ხარჯზე!!!

სირცხვილის განცდა არ არსებობს!

არც პასუხისმგებლობის შეგრძნება.

ქალაქის მერი ალბათ კიდევ გვეტყვის, რომ მისი კომპეტენცია არ არის და არაა ვალდებული პასუხი აგოს მის დაქვემდებარებაში არსებულ უწყებებში ჩადენილ დანაშაულზე! არც დაღუპულ ბავშვებზე! არც მოპარულ მილიონებზე! აბა რაზეა პასუხისმგებელი, რას ნიშნავს მერის მანდატი და ხალხის წინაშე ანგარიშის წარდგენის ვალდებულება?

ნებისმიერ წესიერ ქვეყანაში გადამდგარი იქნებოდა საკუთარი თავის ოდნავ მაინც პატივისმცემელი, ღირსეული ქალაქის თავი! მაგრამ სადაა ღირსება? ღირსეული ვერ გაბედავდა ხალხის დაცინვას და წალენჯიხაში ძვირადღირებულ ავტომობილებით რბოლას! თუმცა ამათგან დიდი ხანია არც ღირსებას, არც პასუხისმგებლობას აღარ ველოდებით!", — წერს საქართველოს მე-5 პრეზიდენტი სალომე ზურაბიშვილი.

ცნობისათვის, სუს-ის ინფორმაციით, დაკავებულია 5 პირი, რომლებიც 2023-2026 წლებში, ყოველდღიურად, უფასო სასადილოების 14 451-მდე ბენეფიციარს არაკეთილსინდისიერად ემსახურებოდა და გამგეობებიდან მიღებულ 3 529 000 ლარს თაღლითურად დაეუფლა.