რეგიონალური განვითარებისა და ინფრასტრუქტურის მინისტრმა ნოდარ ჯავახიშვილმა, ვანო მერაბიშვილის საქმეზე, სტრასბურგის სასამართლოს გადაწყვეტილებაზე კომენტარი გააკეთა. მედიასთან საუბრისას ჯავახიშვილმა განაცხადა, რომ მერაბიშვილი სიცოცხლის ბოლომდე უნდა იჯდეს ციხეში:

"მე როგორც მინისტრი ისე არ გეტყვით მაგრამ ვანო მერაბიშვილი სიცოცხლის ბოლომდე ციხეში უნდა იჯდეს. ვანო მერაბიშვილი ციხეში იჯდება თუ არ იჯდება, ეს არც არაფორმალურ მმართველობაზე მიუთითებს და არც ადამიანის უფლებების დარღვევაზე. ვანო მერაბიშვილი როცა გარეთ იყო, მაშინ იყო ადამიანის უფლებები დარღვეული და არამარტო ვანო მერაბიშვილი, მის გვერდით მისი უამრავი ძმა და მეგობარი უნდა იჯდეს".

ადამიანის უფლებათა ევროპულმა სასამართლომ 14 ივნისს გამოტანილ გადაწყვეტილებაში აღნიშნა, რომ ვანო მერაბიშვილის მიმართ ქართულმა სახელმწიფომ დაარღვია კონვენციის მეხუთე მუხლის მესამე პუნქტი და მე-18 მუხლი პირველთან მიმართებით. დარღვევის ერთ-ერთი ეპიზოდი სწორედ ფარცხალაძის პროკურორობის პერიოდს ეხება.