"რუსეთის საოკუპაციო ძალების წარმომადგენლებმა გორის მუნიციპალიტეტის სოფელ ქვეშის მიმდებარედ უკანონოდ დააკავეს საქართველოს ერთი მოქალაქე", — ამის შესახებ ინფორმაციას სახელმწიფო უსაფრთხოების სამსახური ავრცელებს. მათი ცნობით, უკანონო დაკავების მორიგი ფაქტის შესახებ დაუყოვნებლივ ეცნობა ჟენევის საერთაშორისო დისკუსიების თანათავმჯდომარეებსა და საერთაშორისო პარტნიორებს.

"ამოქმედებულია ყველა არსებული მექანიზმი უკანონოდ დაკავებული საქართველოს მოქალაქის უმოკლეს ვადებში გასათავისუფლებლად.

საქართველოს ოკუპირებულ ტერიტორიებზე, ისევე როგორც საოკუპაციო ხაზის გასწვრივ ჩადენილ ყველა დესტრუქციულ ქმედებაზე პასუხისმგებლობა ეკისრება საოკუპაციო ძალას", — ნათქვამია გავრცელებულ ინფორმაციაში.

ცნობისათვის, ოკუპირებული სამხრეთ ოსეთის ე.წ. შინაგან საქმეთა სამინისტრომ დღეს გაავრცელა ინფორმაცია, რომ ოკუპირებული ცხინვალის რეგიონში არცევის ოლქის ე.წ. შინაგან საქმეთა დეპარტამენტის თანამშრომლებმა სამხრეთ ოსეთის ე.წ. საზღვრის უკანონოდ კვეთისთვის 1992 წელს დაბადებული საქართველოს მოქალაქე დააკავეს.