აზერბაიჯანის პრეზიდენტმა, ილჰამ ალიევმა ხანქენდში, შუშას გლობალური მედიაფორუმის მონაწილეებთან შეხვედრაზე უკრაინელებს მოუწოდა: "არასოდეს მიიღოთ ოკუპაცია." ამის შესახებ ინფორმაციას Anadolu ავრცელებს.

მან განაცხადა, რომ აზერბაიჯანი თითქმის 30 წლის განმავლობაში არ შეეგუა ოკუპირებულ ყარაბაღს და საბოლოოდ ტერიტორიების გათავისუფლება შეძლო.

ალიევის თქმით, ეუთოს მინსკის ჯგუფი, რომელიც 1992 წელს შეიქმნა და რომლის თანათავმჯდომარეები იყვნენ საფრანგეთი, რუსეთი და აშშ, ცდილობდა სტატუს კვოს შენარჩუნებას და არა კონფლიქტის გადაჭრას. ისინი აზერბაიჯანს მოუწოდებდნენ სიტუაციას შეჰგუებოდა, მაგრამ ბაქომ ამაზე უარი თქვა.

"2020 წელს 44 დღეში ახალი რეალობა შევქმენით და მათ ამის მიღება მოუწიათ. უკრაინელებიც არ უნდა დანებდნენ და არასდროს უნდა შეეგუონ ტერიტორიული მთლიანობის დარღვევას. [...] რაც დასაწყისში ვთქვი, შესაძლოა ძალიან მარტივად და თავიდან არიდების მცდელობასავით ჩანდეს, თუმცა ამის მიღმა სინამდვილეში დგას ის, რაც ჩვენ გამოვიარეთ როგორც ომში, ისევე მოლაპარაკებების მაგიდაზე და იმის შემდეგ, რაც სუვერენიტეტი სრულად აღვადგინეთ. ზოგიერთი საერთაშორისო აქტორის მხრიდან ყველა მუქარაზე, ზეწოლაზე, შანტაჟსა და სხვა შეუფერებელ ქმედებებზე რომ მოვყვე, ამისთვის ალბათ ცალკეული შეხვედრა იქნება საჭირო. თუმცა, რომ დავუბრუნდე, რაც ვთქვი — არასდროს არ დანებდეთ და არასდროს არ შეეგუოთ ტერიტორიული მთლიანობის დარღვევას" — თქვა ალიევმა.