ზოგ ადამიანს ცხელ-ცხელი ყავისა და ჩაის დალევა უყვარს, მაგრამ, შესაძლოა, ეს საყლაპავი მილის კიბოს განვითარების რისკს ზრდიდეს. ოქსფორდის უნივერსიტეტის მკვლევრებმა თითქმის მილიონი ადამიანის სამედიცინო მონაცემი შეისწავლეს და ამ საკითხის შესახებ ყველაზე მასშტაბური კვლევა გამოაქვეყნეს.

ჟურნალ International Journal of Cancer-ში გამოქვეყნებული ნაშრომის თანახმად, "ძალიან ცხელი" სასმელების მოყვარულებს საყლაპავის სიმსივნის განვითარების სამჯერ უფრო მაღალი რისკი აქვთ. ეს იმათთან შედარებით, ვინც თბილ ჩაის ან ყავას ანიჭებს უპირატესობას.

ოქსფორდის უნივერსიტეტის მეცნიერები "ძალიან ცხელ" კატეგორიაში 65 გრადუს ცელსიუსსა და მასზე მაღალ ტემპერატურას მოიაზრებენ. ორთქლიანი მდუღარე სითხე კუჭისკენ მიმავალ გზაზე საყლაპავი მილის უჯრედოვან საფარს აზიანებს. მონაცემების მიხედვით ვარაუდობენ, რომ დღეში ექვსი ან მეტი ფინჯანი ცხელი სასმლის მიღება საფრთხეს კიდევ უფრო ზრდის.

ადუღებული ჩაიდნიდან ფინჯანში ახლად დასხმული სითხის ტემპერატურა 90-95 გრადუსს აღწევს. სპეციალისტები მოსახლეობას ურჩევენ, რომ დალევამდე რამდენიმე წუთი მოიცადონ, რათა სასმელს გაგრილების საშუალება მისცენ.

ამასთან, 118 ახალგაზრდაზე ჩატარებული სხვა კვლევა ცხადყოფს, რომ ადამიანების უმეტესობა შავ ყავას "ზედმეტად ცხლად" მხოლოდ 70 გრადუსსა და მასზე მაღალ ტემპერატურაზე აღიქვამს. ეს ჯანმრთელობისთვის სარისკო ზღვარს საგრძნობლად აღემატება.

მკვლევრები ხაზგასმით ამბობენ, რომ ჩაიში ან ყავაში რძის დამატება ტემპერატურას მცირედით ამცირებს, მაგრამ უსაფრთხო ნიშნულამდე ვერ ჩამოჰყავს. სწორედ ამიტომ, ექიმები გვირჩევენ, სასმელი მხოლოდ მას შემდეგ მივიღოთ, რაც სითხე შედარებით დაბალ ტემპერატურას მიაღწევს.

მიუხედავად აღნიშნული საფრთხისა, საყლაპავის კიბო იშვიათ დაავადებათა კატეგორიას მიეკუთვნება. დიდი ბრიტანეთის სტატისტიკა აჩვენებს, რომ მსგავსი სიმსივნე მოსახლეობის მხოლოდ 1%-ს უვითარდება.

საყლაპავის კიბოს 10 შემთხვევიდან ერთის ან ორის თავიდან აცილება უბრალოდ ცხელ სასმელებზე უარის თქმითაა შესაძლებელი. დაავადების უფრო მაღალ რისკს თამბაქოს მოხმარება და ალკოჰოლის ჭარბი მიღება წარმოშობს. შესაბამისად, პრევენციისთვის, პირველ რიგში, სწორედ ამ მავნე ჩვევებზე უარის თქმაა მნიშვნელოვანი.

რაც შეეხება სიმპტომებს, დაავადება ხშირად გულძმარვით, საჭმლის მონელების დარღვევით, ყელის ან გულმკერდის ტკივილითა და წონის უმიზეზო კლებით ვლინდება.