რუსეთში სიღარიბის ოფიციალური მაჩვენებელი 7%-მდე შემცირდა, თუმცა ეს, როგორც ჩანს, მოსახლეობის კეთილდღეობის რეალურ გაუმჯობესებას სრულად არ ასახავს. "როსსტატის" მონაცემებით, მეორე კვარტალში სიღარიბის ზღვარს ქვემოთ რუსეთის მოსახლეობის 7% ცხოვრობდა, რაც წინა წელთან შედარებით 0,4 პროცენტული პუნქტით ნაკლებია. ამასთან, ექსპერტები მიუთითებენ, რომ 2021 წელს შეცვლილმა მეთოდოლოგიამ სიღარიბის ოფიციალური მაჩვენებელი მნიშვნელოვნად შეამცირა. ამის შესახებ The Moscow Times წერს.

ვლადიმირ პუტინის ე.წ. "მაისის ბრძანებულება", რომელიც 2030 წლისთვის სიღარიბის დონის 7%-ზე ქვემოთ შემცირებას ითვალისწინებს, რუსეთში უკვე გასულ წელს შესრულებულად გამოცხადდა — მაშინ სიღარიბის დონემ 6,7% შეადგინა.

თუმცა ეს არ ნიშნავს, რომ ადამიანებმა სიღარიბეს თავი დააღწიეს. გასული წლის შედეგებით, სიღარიბის ზღვარზე დაბალი შემოსავალი 9,7 მილიონ ადამიანს ჰქონდა. მეორე კვარტალში სიღარიბის ზღვარი 17,8 ათას რუბლს შეადგენდა — შრომისუნარიანი მოსახლეობისთვის 19,3 ათასს, პენსიონერებისთვის 14,7 ათასს, ხოლო ბავშვებისთვის 17,5 ათას რუბლს. ექსპერტებში ეს მაჩვენებელი გაკვირვებას იწვევს. ფინანსთა უნივერსიტეტის პროფესორის, ალექსანდრ საფონოვის თქმით, ამ თანხით ცხოვრება პრაქტიკულად შეუძლებელია. სოციოლოგ თემირ ხაგუროვის შეფასებით კი, "როსსტატის" მიერ დადგენილი სიღარიბის ზღვარი რეალური უკიდურესი სიღარიბის დონეს უფრო შეესაბამება.

2021 წლიდან სიღარიბის ზღვრის გამოთვლის მეთოდიკა შეიცვალა: მისი განსაზღვრა მინიმალური სამომხმარებლო კალათის ღირებულებას აღარ უკავშირდება. ამის ნაცვლად, 2020 წლის ბოლოს არსებული მაჩვენებელი, რომელიც მედიანური შემოსავლების წილის მიხედვით იყო გამოთვლილი, ინფლაციის შესაბამისად ინდექსირდება.

რუსეთის მეცნიერებათა აკადემიის ეკონომიკის ინსტიტუტის ექსპერტები აღნიშნავენ, რომ ახალმა მეთოდოლოგიამ სიღარიბის დონე ხელოვნურად შეამცირა. მათი გათვლებით, მეთოდოლოგიის შეცვლის გარეშე სიღარიბის მაჩვენებელი მნიშვნელოვნად მაღალი იქნებოდა — მაგალითად, 2022 და 2023 წლებში ის 11,8% და 11,1% იქნებოდა, ნაცვლად "როსსტატის" ახალი მეთოდიკით მიღებული 9,8% და 8,5%-ისა.

სწორედ ამიტომ, ბევრი რუსი, რომელიც ფორმალურად ღარიბთა კატეგორიას არ მიეკუთვნება, თავს მაინც ღარიბად მიიჩნევს. მოსახლეობის მიერ აღქმული ინფლაცია მნიშვნელოვნად აღემატება ოფიციალურ მაჩვენებელს, რომლის მიხედვითაც სიღარიბის ზღვარიც იზრდება.