რუსეთის სახელმწიფო მედიასაშუალება RT-ის მთავარი რედაქტორი და ქვეყნის ერთ-ერთი ყველაზე ცნობილი პროპაგანდისტი მარგარიტა სიმონიანი სომხეთის პრემიერმინისტრ ნიკოლ ფაშინიანს "ანტიქრისტეს ანუსს" უწოდებს.

სიმონიანმა მკაცრად გააკრიტიკა ფაშინიანი სომხეთის სამოციქულო ეკლესიასთან მიმდინარე დაპირისპირების გამო და დაგმო მისი "შეტევები მსოფლიოში უძველეს ქრისტიანულ სახელმწიფო ეკლესიაზე".

"ფაშინიანი პირადად არ არის ანტიქრისტე, მაგრამ ანტიქრისტე რაღაც კოლექტიური, რაღაც დიდი არსებაა. ფაშინიანი შეიძლება იყოს ანტიქრისტეს პატარა თითი, ანტიქრისტეს აპენდიქსი. შეიძლება ეფენდი ფაშინიანი ანტიქრისტეს ანუსიც იყოს", — განაცხადა სიმონიანმა ვლადიმირ სოლოვიოვის ტელეგადაცემაში. მან ამ ვიდეოს შემოკლებული ვერსია ინგლისური სუბტიტრებით ტვიტერზეც გაავრცელა.

გადაცემის წინა დღის ჩანაწერში, სიმონიანი, რომელიც ეთნიკურად სომეხია და სომხეთში პერსონა ნონ გრატად არის გამოცხადებული, სომეხ ხალხს ფაშინიანის წინააღმდეგ აჯანყებისკენ მოუწოდებდა:

"სომხებო, თქვენ საკუთარ მიწაზე რას ელით? რომ თქვენს შვილებს თავი მოაჭრან და თქვენს ქალიშვილები ჰარამხანებში მოაქციონ — კიდევ ერთხელ?" — თქვა მან.

ბოლო კვირის განმავლობაში, სომხეთის ხელისუფლებამ ორი მაღალი რანგის სასულიერო პირი დააკავა, რომლებიც ან გადატრიალების გეგმაში, ან მისკენ მოწოდებაში არიან ეჭვმიტანილნი.

დაკავებები ფაშინიანისა და მისი ცოლის, ანა ჰაკობიანის, მხრიდან სასულიერო პირებისადმი კრიტიკულ და სკანდალურ განცხადებებს მოჰყვა.

სიმონიანი ერთადერთი მაღალი რანგის რუსი ფიგურა არ ყოფილა, ვინც სომხეთის მთავრობის და ეკლესიასთან დაპირისპირების კრიტიკა გამოთქვა.

ორშაბათს, რუსეთის საგარეო საქმეთა მინისტრმა სერგეი ლავროვმა აღნიშნული დაპირისპირება სომხეთის შიდა საქმედ შეაფასა, თუმცა დასძინა, რომ "ათასწლოვანი სომხური სამოციქულო ეკლესიის წინააღმდეგ შეტევები სერიოზულ შეშფოთებას იწვევს".

"ეკლესია ყოველთვის იყო სომხური საზოგადოების ერთ-ერთი ძირითადი საყრდენი და არ გვსურს, რომ ეს ეკლესია უსაფუძვლო თავდასხმების მსხვერპლი გახდეს," — აღნიშნა ლავროვმა.

პასუხად, სომხეთის საგარეო საქმეთა მინისტრმა არარატ მირზოიანმა ლავროვს მოუწოდა, თავი შეიკავოს სომხეთის შიდა საქმეებში ჩარევისგან.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.