საქართველოს ახალგაზრდა იურისტთა ასოციაციის თქმით, საუბნო საარჩევნო კომისიების დაკომპლექტების პროცესი ეჭვებს იწვევს, კერძოდ, საუბარია შესაძლო ჩარევებსა და კომისიების მმართველ პარტიასთან დაკავშირებული პირებით დაკომპლექტების შესახებ:

"მნიშვნელოვანია, რომ პროფესიული წევრების კვოტით კომისიის შემადგენლობაში რეალურად იყვნენ წარმოდგენილნი დამოუკიდებელი, კომპეტენტური კადრები, და არა რომელიმე პოლიტიკურ ძალასთან ასოცირებული ან მისდამი ლოიალურად განწყობილი ადამიანები."

საიას განცხადებით, საუბნო საარჩევნო კომისიაში პროფესიული კადრების კვოტის "არალერევანტურად" შევსება საზოგადეობის მხრიდან კითხვებს გამოიწვევს.

ასოციაცია საოლქო კომისიებს მოუწოდებს, საუბნო კომიის წევრთა არჩევის პროცესი ღიად და გამჭირვალედ წარმართოს, რათა უზრუნველყოფილ იქნას ობიექტურობა და მიუკერძოებლობა.

ასევე, საია მიმართავს ცესკოს, რათა მან თვალი ადევნოს მიმდინარე პროცესებს, საზოგადოებას ინფორმაცია მიაწოდოს კონკურსის შედგებზე და შეისწავლოს და აღფოხვრას შესაძლო არასათანადო ჩარევები.

ასოციაციის თქმით, პარლამენტმა უნდა დაიწყოს საარჩევნო ადმინისტრაციის დაკომპლექტების მარეგულირებელი კანონმდებლობის რეფორმა, რომლის ფარგლებშიც საარჩევნო ადმინისტრაციის ზემდგომი ორგანოები (ცესკო, ოლქი) პროფესიული ნიშნით დაკომპლექტდებიან აპოლიტიკური და დამოუკიდებელი წევრებით.

საქართველოს ახალგაზრდა იურისტთა ასოციაციაციის განცხადებით, ისინი დააკვირდებიან კონკურსების პროცესს და ამასთან დაკავშირებით საზოგადოებას ფაქტობრივ და სამართლებრივ შეფასებას მიაწვდიან.

2017 წლის პირველი სექტემბრიდან ხუთი სექტემბრის ჩათვლით საოლქო საარჩევნო კომისიებში საუბნო საარჩევნო კომისიების წევრების შესარჩევი კონკურსი იმართება. საუბნო კომისიები, კანონმდებლობის მიხედვით, კომპლექტდებიან როგორც პარტიული, ასევე პროფესიული წევრებით (7 პარტიული და 6 პროფესიული წევრი).

27 აგვისტოს ნაციონალურმა მოძრაობამ ქართული ოცნება საარჩევნო მანიპულაციებში დაადანაშაულა. პარტიის ინფორმაციით, საუბნო კომისიების დაკომპლექტება დარღვევებით მიმდინარეობს.