მომღერალსა და პროდიუსერს, კახაბერ ცისკარიძეს ბათუმის მერობა სურს. საკუთარი კანდიდატურის შესახებ მან დაახლოებით ერთი საათის წინ ისაუბრა.

"მე ვარ ბათუმელი, მე ვარ აჭარელი და ბათუმიდან გამომდინარე ვარ პოპულარული გამხდარი მთელ ქვეყანაში და ვფიქრობ, რომ მაქვს ვალი, რომელიც შემიძლია ამ სახით დავაბრუნო", - განმარტავს ცისკარიძე On.ge-სთან საუბრისას ბათუმის მერად გახდომის სურვილს.

მისი მერობის დროს ბათუმის პრიორიტეტი ხელოვნება და კულტურა იქნება. ამით ის ტურისტების მიზიდვას გეგმავს.

"მნიშვნელოვანი იქნება, რამდენად მზადაა ბათუმი ამ ცვლილებებისთვის და ბათუმის მერის სტერეოტიპის დანგრევისთვის", - აღნიშნა ცისკარიძემ.

მისი თქმით, ის ბათუმელებისგან მერობაზე მხარდაჭერაზე პასუხს, პირველ რიგში, კანდიდატად რეგისტრაციისთვის საჭირო ხელმოწერების შეგროვებით მიიღებს.

"დღეს უკვე ხალხი საუბრობს იმაზე, რომ კახაბერი გახდეს კახა-მერი", - ამბობს ბათუმის მერობის მსურველი.