საქართველოს ახალგაზრდა იურისტთა ასოციაციაში მიიჩნევენ, რომ თბილისის მერიის დაკავებული თანამშრომლის, ოთარ აბესაძის შესახებ, პოლიტიკოსები გაუმართლებლად საუბრობენ. აბესაძე სახელმწიფო უსაფრთხოების სამსახურმა ქრთამის აღების ბრალდებით 11 ივლისს დააკავა.

"ოთარ აბესაძის საქმეზე გაკეთებული არაერთი განცხადება არღვევს მისი უდანაშაულობის პრეზუმფციას და ხელს უწყობს საზოგადოებრივი აზრის ჩამოყალიბებას ერთმნიშვნელოვნად ბრალდებულის წინააღმდეგ".

საია მიიჩნევს, რომ პოლიტიკოსების მიერ გაჟღერებული განცხადებების შინაარსი ქმნის შთაბეჭდილებას, რომ დანაშაულის ჩადენა და მასში ბრალდებულის მონაწილეობა უკვე დადგენილი და უტყუარია.

"საქმეზე გამოძიება ჯერ არ დასრულებულა, ხოლო სასამართლოს - იმ ერთადერთ ორგანოს საქართველოში, ვისაც აქვს კანონით მინიჭებული ლეგიტიმური უფლება, პირი გამოაცხადოს დამნაშავედ - ჯერ საქმის განხილვაც არ დაუწყია", - აცხადებს საია.

ორგანიზაციაში აცხადებენ, რომ პოლიტიკოსების განცხადებები ეწინააღმდეგება საქართველოს კონსტიტუციით, ადამიანის უფლებათა ევროპული კონვენციითა და სხვა საერთაშორისო აქტებით განმტკიცებულ ერთ-ერთ უმნიშვნელოვანეს უფლებას - კერძოდ უდანაშაულობის პრეზუმფციასთან. საქართველოს კონსტიტუციის მიხედვით, ადამიანი უდანაშაულოდ ითვლება, ვიდრე მისი დამნაშავეობა არ დამტკიცდება კანონით დადგენილი წესით და კანონიერ ძალაში შესული სასამართლოს გამამტყუნებელი განაჩენით.

ახალგაზრდა იურისტთა ასოციაცია მოუწოდებს პოლიტიკოსებს, რომ პატივი სცენ საქართველოს კონსტიტუციით და კანონმდებლობით გარანტირებულ უფლებებს. ორგანიზაციის განმარტაებით, პოლიტიკოსებმა თავი უნდა შეიკავონ ისეთი განცხადებებისა და გამონათქვამებისაგან, რაც სასამართლოს მიერ განაჩენის გამოტანამდე ბრალდებულს დამნაშავედ წარმოაჩენს.

საქართველოს სახელმწიფო უსაფრთხოების სამსახურის ინფორმაციით, ქრთამის აღების ფაქტზე თბილისის მუნიციპალიტეტის მერიის თანამშრომელი - ოთარ აბესაძე 11 ივლისს დააკავეს.

სუს-ის ინფორმაციით, გამოძიებამ დაადგინა, რომ ოთარ აბესაძე მოქალაქეებს თბილისში, მდინარე მტკვარზე, ტივზე ინფრასტრუქტურის მოწყობისთვის საჭირო ნებართვების, სამი ათასი დოლარის სანაცვლოდ, აღებას დაჰპირდა.