რა ხდება: პალესტინელებს, რომლებიც ისრაელში მუშაობენ, ისრაელის ხელისუფლება ალყაში მოქცეულ ღაზაში დააბრუნებს, სადაც ომს უკვე 9 ათასზე მეტი ადამიანი ემსხვერპლა.

  • "ისრაელი ყველა კონტაქტს წყვეტს ღაზასთან. ჩვენს ტერიტორიაზე აღარ იქნებიან პალესტინელი მუშები ღაზიდან, ისინი დაბრუნდებიან ღაზაში," - წერია პრემიერ-მინისტრის ოფისის განცხადებაში, რომელიც X-ზე (ყოფილი "ტვიტერი") გამოქვეყნდა.
  • 7 ოქტომბრამდე, ვიდრე ჰამასი ისრაელის ტერიტორიაზე ტერაქტებს მოაწყობდა, ღაზიდან ისრაელში შეშვების უფლება 18500-მდე ადამიანს მისცეს.

რა ვითარებაა ახლა ღაზის სექტორში: ისრაელის შეიარაღებული ძალების ინფორმაციით, მათმა ჯარმა ალყაში მოაქცია ქალაქი ღაზა და მოწინავე სადარაჯო პოსტებს და ჰამასის ინფრასტრუქტურას უტევენ.

  • ღაზის ტერიტორიაზე მოკლული ისრაელელი ჯარისკაცების რაოდენობა 23-მდე გაიზარდა.
  • ბოლო ინფორმაციით, ომს, სულ მცირე, 9061 პალესტინელი ემსხვერპლა, მათი უმეტესობა ქალი და ბავშვია.
  • დაიჭრა 32 000-ზე მეტი ადამიანი.