პატრიარქის მდივნის მკვლელობის მცდელობაში ბრალდებული დეკანოზ გიორგი მამალაძის ძმას, თორნიკე მამალაძეს, შეხვედრისას, საქართველოს მართლმადიდებელი ეკლესიის პატრიარქმა, ილია მეორემ, ასავლ-დასავალისთვის მიცემული ინტერვიუს გამო უსაყვედურა:

"გუშინდელ გაზეთში ეწერა, პატრიარქთან ღამე რჩებოდაო ისე, დაცვის წევრებიც არ იყო მასთანო. არ ყოფილა ასეთი შემთხვევა და უნდა გეშინოდეს ღმერთისა, როცა ამას ლაპარაკობ".

თორნიკე მამალაძემ პატრიარქს უთხრა, რომ აღნიშნულის თქმის მიზანი იყო იმ ხმების გაფანტვა რომ თითქოს, მამალაძე პატრიარქს არც კი იცნობდა.

"ჩემთან რჩება სამი ადამიანი: დაცვის წარმომადგენელი, ერთი მონაზონი და ერთი მღვდელი. და თქვენ იმას ამბობთ, რომ ღამე რჩებოდაო, კიდეც რომ დარჩენილიყო, რა მოხდებოდა? ხოდა ძალიან ფრთხილად უნდა ილაპარაკო, რაც თავში მოგადგება უნდა განსაჯო, პატრიარქს ეჭვის თვალით არ უნდა შეხედო", - უთხრა პატრიარქმა თორნიკე მამალაძეს.

თორნიკე მამალაძეს საგაზეთო ინტერვიუს გამო უსაყვედურეს შეხვედრაზე მყოფმა სასულიერო პირებმაც და მოუწოდეს მას, ისეთ რამეებს ნუ ილაპარაკებს, რაც ეკლესიის დისკრედიტაციას მოახდენს.

ილია მეორისა და მამალაძის ოჯახის შეხვედრის აუდიო ჩანაწერი საპატრიარქომ დღეს გამოაქვეყნა. შეხვედრა საპატრიარქოში 21 ივნისს გაიმართა მამალაძის ოჯახის მოთხოვნით.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად.

გიორგი მამალაძე წარდგენილ ბრალდებას არ აღიარებს, პროკურატურა კი საპირისპიროს ამტკიცებს. მათ გაავრცელეს ფარული ვიდეოჩანაწერები, რაც, საგამოძიებო უწყების ცნობით, მამალაძის საქმეში ერთ-ერთი მთავარი მტკიცებულებაა.