საქმე 2019 წლის 15 აპრილს გურჯაანის მუნიციპალიტეტის სოფელ კაჭრეთში მცხოვრებ ზვიად მთავრიშვილზე პოლიციელების მხრიდან განხორციელებულ სავარაუდო ძალადობას ეხება. განცხადებაში ნათქვამია, რომ ძალადობის შედეგად კაცი გარდაიცვალა.

რატომ არის მნიშვნელოვანი: ორგანიზაციის მიერ ევროპულ სასამართლოში წარდგენილ საქმე ადამიანის უფლებათა ევროპული კონვენციის მე-2, სიცოცხლის უფლებისა და მე-3, წამების აკრძალვის მუხლებით დაცული უფლებების დარღვევას ეხება.

• "საიას საჩივარში დასაბუთებულია, რომ სახელმწიფომ არა მხოლოდ დაარღვია საქმეზე ეფექტიანი და სრულყოფილი გამოძიების წარმოების ვალდებულება, არამედ ზვიად მთავრიშვილის გარდაცვალება, სავარაუდოდ, სწორედ სახელმწიფოს მოხელეთა ქმედებების პირდაპირ შედეგს წარმოადგენს".

დეტალები: ორგანიზაცია მედიაში გავრცელებულ და ოჯახის წევრების ინფორმაციაზე დაყრდნობით წერს, რომ 2019 წლის 22 მარტს ოჯახში შეკამათების შემდეგ პოლიციელები მთავრიშვილის სახლში მივიდნენ.

• გარდაცვლილის დის განმარტებით, ოთახში შესვლისთანავე ისინი მთავრიშვილს უხეშად მიმართავდნენ, შემდეგ კი თელავის პოლიციაში გადაიყვანეს.
• ორგანიზაცია მიუთითებს, რომ სახლში დაბრუნების შემდეგ მთავრიშვილი თავის ტკივილს უჩიოდა, აცხადებდა, რომ პოლიციელები ფიზიკურად გაუსწორდნენ და თავი არეში დაზიანებები მიაყენეს.

ორგანიზაცია აღნიშნავს, რომ ზვიად მთავრიშვილის ჯანმრთელობის მდგომარეობა მეორე დღიდანვე გაუარესდა. კერძოდ, მას ძლიერი თავის ტკივილები და მეხსიერებასთან დაკავშირებით პრობლემები დაეწყო.

• საიას ცნობით, პირველ აპრილს ის გურჯაანის საავადმყოფოში უგონო მდგომარეობაში გადაიყვანეს, სადაც ტრავმული სუბდურული სისხლჩაქცევის, კომის დიაგნოზი დაუსვეს.
• იმავე დღეს ზვიად მთავრიშვილი ღუდუშაურის კლინიკაში გადაიყვანეს.
• ორგანიზაციის ინფორმაციით, ჯანმრთელობის მდგომარეობის შესახებ გაცემულ ცნობაში მითითებულია, რომ ზვიად მთავრიშვილს დაუდგინდა კომა, ქალა-ტვინის დახურული ტრავმა, მარცხენა დიდი ჰემისფეროს ტრავმული სუბდურული ჰემატომა, თ/ტ დაჟეჟილობა, შუამდებარე სტრუქტურების ცდომით, სუნთქვის მწვავე უკმარისობა.
• მთავრიშვილი იმავე წლის 15 აპრილს საავადმყოფოში გარდაიცვალა.

საიას ცნობით, 2019 აპრილს პროკურატურას მოუწოდეს, რომ საქმეზე ეფექტიანი და სრულყოფილი გამოძიება ეწარმოებინა.

• ხაზს უსვამდნენ გამოძიების პროცესში ოჯახის წევრთა ჩართულობის მნიშვნელობასაც.
• განცხადებაში ნათქვამია, რომ ამის მიუხედავად, კახეთის საოლქო პროკურატურა საქმეს სსსკ-ის 333-ე მუხლის მე-3 ნაწილის ბ ქვეპუნქტით იძიებს, რაც ძალადობით ან იარაღის გამოყენებით სამსახურეობრივი უფლებამოსილების გადამეტებას გულისხმობს.
• "ეს კიდევ ერთხელ ადასტურებს იმ ფაქტს, რომ წლების განმავლობაში მნიშვნელოვან გამოწვევად რჩება საგამოძიებო ორგანოების მიერ არასათანადო მოპყრობის ფაქტების სწორი კვალიფიკაცია".
• "საქმის ფაქტობრივი გარემოებები ნათლად მოწმობს, რომ მთავრიშვილის მიმართ ჩადენილია არაადამიანური ან/და დამამცირებელი მოპყრობა, რომელსაც, შედეგად, ადამიანის გარდაცვალება მოჰყვა".

ამასთან, ორგანიზაციაში ამბობენ, რომ მთავრიშვილის დას დაზარალებულის სტატუსი 2 წელზე მეტი ხნის მანძილზე არ ჰქონდა და ცნობა მხოლოდ გასული წელს მიანიჭეს.

• განმარტავენ, რომ ამ სტატუსის გარეშე მას საქმის მასალების გაცნობისა და სრულყოფილი ინფორმაციის მიღების შესაძლებლობა არ ჰქონდა.
• განცხადებაში ნათქვამია, რომ არაერთი მიმართვის მიუხედავად, დაზარალებულის უფლებამონაცვლის წერილები და განცხადებები უმეტესად უპასუხოდ რჩება, რიგ შემთხვევებში კი შაბლონურია და კონკრეტულ ინფორმაციას არ შეიცავს.
• ამბობენ იმასაც, რომ საგამოძიებო ორგანომ დღემდე ვერ უზრუნველყო შესაბამისი ექსპერტიზის ჩატარება, ხოლო საპროცესო და საგამოძიებო მოქმედებებს მთელი რიგი ხარვეზები აქვს.