პარლამენტის თავმჯდომარის, შალვა პაპუაშვილის განცხადებით, აღმოჩნდა, რომ საქართველო სხვა ქვეყნებთან შედარებით, შეიძლება, ყველაზე ნაკლებად დამოკიდებული ქვეყანაა რუსეთზე.

რატომ არის მნიშვნელოვანი: საერთაშორისო გამჭვირვალობა — საქართველოს კვლევის მიხედვით, რუსეთზე საქართველოს ეკონომიკური დამოკიდებულება იზრდება.

  • ორგანიზაცია მიუთითებს, რომ რუსული საქონლის იმპორტი, ფულადი გზავნილები და საქართველოში რუსეთის მოქალაქეების მიერ კომპანიის დაფუძნება ზრდის რისკს, რომ საქართველო რუსეთის სანქციების გვერდის ასავლელად იყოს გამოყენებული.

კიდევ რა თქვა პაპუაშვილმა: პაპუაშვილი TI-ის კვლევაზე ამბობს, რომ ესეც ნაწილია იმ კამპანიისა, რომელიც ცდილობს წარმოსახოს, თითქოს გარკვეული ტრენდია საქართველოს რუსეთზე დამოკიდებულება და დასავლეთთან დაშორება.

  • "თვითონვე ქმნიან ყალბ აღქმებს და შემდეგ ამ ყალბ აღქმებს ებრძვიან".
  • მისი თქმით, პოლიტიკურმა პარტიებმა და არასამთავრობო ორგანიზაციებმა იციან და კვლევებიც არის იმაზე, რომ საქართველოში რუსეთიდან შემოდიან ძირითადად ახალგაზრდები, რომელთაც კარგი შემოსავალი აქვთ.
  • პარლამენტის თავმჯდომარის თქმით, ისინი არიან ძირითადად IT სფეროდან, კულტურის სფეროდან, მენეჯმენტის სფეროდან და არიან საშუალო ფენა, რომელმაც რუსეთი დატოვა იმის გამო, რომ სტაბილურობა, დემოკრატია და თავისუფლება სურთ.

ფართო სურათი: კვლევის მიხედვით, მარტში, აპრილში, მაისში და ივნისში საქართველოში 6 400-მდე რუსული კომპანია დარეგისტრირდა, რაც წინა წლის მაჩვენებელზე 7-ჯერ მეტია.

  • საქართველოში სულ 13 500-მდე რუსული კომპანიაა რეგისტრირებული და მათი ნახევარი უკრაინაში ომის დაწყების შემდეგ დარეგისტრირდა.
  • მარტიდან დარეგისტრირებული კომპანიების 93% ინდივიდუალური საწარმოა. ეს იმას მიანიშნებს, რომ რუსეთის მოქალაქეების ნაწილი საქართველოში საცხოვრებლად და ბიზნესის საკეთებლად გადმოვიდა.
  • ომის დაწყების შემდეგ რუსეთიდან ყველაზე მეტად საწვავის იმპორტი, 280%-ით (118 მილიონი დოლარით) გაიზარდა.
  • ელექტროენერგიის იმპორტი 4-ჯერ (9 მილიონი დოლარითაა) გაზრდილი.