პროკურატურის დატოვების შემდეგ ბესელიამ განაცხადა, რომ დაზარალებულად ცნობა აუცილებელი სამართლებრივი პროცედურაა, თუმცა უფრო მნიშვნელოვანი იმის დადგენაა, თუ ვინ ჩადიოდა ამას.

რატომ არის მნიშვნელოვანი: 2021 წლის 13 სექტემბერს ერთ-ერთი ღია წყაროზე აიტვირთა სასულიერო პირებთან, ჟურნალისტებთან აქტივისტებთან, დიპლომატებთან და სხვა პირებთან დაკავშირებით მასალები, რომელმაც სავარაუდოდ, სახელმწიფო უსაფრთხოების სამსახურიდან გაჟონა.

  • ოფიციალურად მისი ავთენტურობა დადასტურებული არ არის, თუმცა საკუთარი თავი არაერთმა ადამიანმა ამოიცნო.

დეტალები: ბესელია აღნიშნავს, რომ ეს დანაშაული არსებული ხელისუფლების პირობებშია ჩადენილი.

  • ის განმარტავს, რომ დაზარალებულად ცნობა თავად მოითხოვა და ამ საქმეზე გასულ წელს დაკითხეს, თუმცა სტატუსი ამ დრომდე არ ჰქონდა.
  • მისი თქმით, წარმოუდგენელი ამბავია, რომ ნორმალურ სახელმწიფოში ასეთ საქმეზე დღემდე არავინ აიღო პასუხისმგებლობა და მთავარი, რასაც ითხოვს სწორედ ესაა — "ვინმემ აიღოს პასუხისმგებლობა ამ სისტემურ დანაშაულებზე".

ბესელია მიუთითებს, რომ ჩანაწერები 2017-2018 წლებისაა, როდესაც ის იურიდიული კომიტეტის თავმჯომარე და მმართველი გუნდის წევრი იყო.

  • მისივე თქმით, ჩანაწერში საპატრიარქოსთან კომუნიკაციაა ასახული.
  • "წარმოუდგენელი ამბავია, რომ კომიტეტის თავმჯდომარეს, რომელიც მაკონტროლებელ ორგანოს წარმოადგენს, უკანონოდ უსმენენ".
  • "ამ მასშტაბის თვალთვალი და კონტროლი არც მახსოვს".

არქივიდან: ე.წ ფარული მოსმენების საქმეს საერთაშორისო პარტნიორების მხრიდან არაერთი კრიტიკული გამოხმაურება მოჰყვა.

  • გასულ თვეს თვეს მედიაომბუდსმენმა 10 ჟურნალისტის უკანონო მოსმენის საქმეზე ევროპულ სასამართლოში საჩივარი წარადგინა.
  • ბესელიას ინფორმაციით, სტრასბურგის სასამართლოშია გაგზავნილი მისი საქმეც.
  • 29 ივნისს პროკურატურას დაზარალებულის სტატუსის მოთხოვნით ქართული ოცნების ყოფილმა დეპუტატმა და საკონსტიტუციო სასამართლოს მოსამართლემ, მანანა კობახიძემაც მიმართა.