25 ივლისიდან საქართველოს რკინიგზა თბილისი-ბათუმის მიმართულებით მოძრავ ორსართულიან სამგზავრო მატარებლებზე ტარიფებს ცვლის. უცვლელი დარჩა თბილისი-ფოთის, ზუგდიდის, ოზურგეთის და ქუთაისის მიმართულებით მგზავრობის ღირებულება.

რატომ არის მნიშვნელოვანი: მოქალაქეებს მგზავრობა 9-დან 24 ლარამდე უძვირდებათ იმის შესაბამისად, თუ რა ტიპის ბილეთებს ყიდულობენ.

  • მეორე კლასი 25 ლარის ნაცვლად — 34 ლარი;
  • პირველი კლასი 61 ლარის ნაცვლად — 74 ლარი;
  • ბიზნეს კლასი 100 ლარის ნაცვლად — 124 ლარი;

დეტალები: კომპანიის განმარტებით, ძალაში რჩება ყველა შეღავათი მაგისტრალური მიმოსვლის ელექტრომატარებელზე სტუდენტებისთვის, ომის ვეტრანებისა და რკინიგზელებისთვის.

  • ასევე მოქმედებს საბავშვო ტარიფი (50%-იანი) — 10 წლამდე ასაკის ბავშვებისთვის ყველა კატეგორიის ადგილებზე სამგზავრო მატარებლებში;
  • ხოლო 5 წლამდე ასაკის ერთი ბავშვი იმგზავრებს უფასოდ მგზავრთან ერთად, თუ იგი არ დაიკავებს ცალკე ადგილს.

რკინიგზაში აცხადებენ, რომ ტარიფის ზრდის მიზეზებია ბოლო წლებში მნიშვნელოვნად გაზრდილი ელექტროენერგიის, მატარებლების მოვლა-შენახვის, მასალების და სხვა ხარჯები.

  • მათივე თქმით, წლების განმავლობაში, არ განხორცილებულა ტარიფებში ცვლილება და კომპანია საკუთარი სახსრებით ახორციელებდა სამგზავრო გადაყვანების სუბსიდირებას.
  • რკინიგზაში ხაზს უსვამენ იმასაც, რომ ალტერნატიულ ტრანსპორტით მგზავრობის ტარიფები იზრდებოდა სისტემატიურად და ახლა, როცა ისინიც ზრდიან ფასს მგზავრობის ტარიფი, კვლავ რჩება სხვა ტრანსპორტთან შედარებით იაფი.

არქივიდან: ბოლო 5 წლის განმავლობაში პირველად, საქართველოს რკინიგზა მოგებაზე გავიდა.

  • 2017-2020 წლებში კომპანიამ ყოველი წელი ზარალით დაასრულა, ხოლო 2021 წელს 52,7-მილიონიანი მოგება ნახა.
  • სს საქართველოს რკინიგზა ქვეყნისთვის სტრატეგიული მნიშვნელობის კომპანიაა, რომლის 100%-იანი წილის მფლობელი საქართველოს საპარტნიორო ფონდია.