"უფრო უნდა ვუმადლოდე ამას უკრაინას", — ასე ეხმაურება პრეზიდენტი, სალომე ზურაბიშვილი საქართველოსთვის ევროკავშირის წევრობის კითხვარის გადმოცემას. მისი თქმით, რომ არა უკრაინის თავდადებული ბრძოლა, ეს ასე მალე არ მოხდებოდა.

"დღეს საქართველოს ისტორიაში ერთ-ერთი ნამდვილად ღირსშესანიშნავი დღე. ჩვენ დღეს მივიღეთ ევროკავშირისგან ის კითხვარი, რომელსაც არ ველოდით რამდენიმე წელი. ეს არის არაჩვეულებრივი, ახალი შანსი, რაც გაუჩნდა ჩვენს ქვეყანას. ამისთვის უნდა ვუმადლოდეთ, ცხადია, ევროკავშირის ყველა წევრ ქვეყანას და სრულიად ევროკავშირის ხელმძღვანელობას, ევროკომისისიასა და ევროპულ საბჭოს. მაგრამ კიდევ უფრო უნდა ვუმადლოდე ამას უკრაინას და უკრაინის ბრძოლას.

რომ არ ყოფილიყო ეს თავდადებული ბრძოლა უკრაინისა, ალბათ ეს დღეც არ დადგებოდა, ყოველშემთხვევაში არ დადგებოდა სწრაფად და როდის მოვიდოდა ეს დღე, ამას ვერავინ იტყოდა. ევროკავშირმა გამომდინარე, ამ ტრაგიკული მდგომარეობიდან, გადაწყვეტილება მიიღო, რომ აეჩქარებინა ეს პროცესი და გაეხადა ეს პროცესი უფრო პოლიტიკური ვიდრე ბიუროკრატიული", — განაცხადა მან.

საქართველოს ევროკავშირის წევრობის კითხვარი დღეს, 11 აპრილს გადასცეს. ქვეყანამ ევროკავშირის წევრობის კანდიდატის სტატუსის მიღებაზე განაცხადს ხელი 3 მარტს მოაწერა.