თბილისის მერიის განცხადებით, ბიუჯეტის სარეზერვო ფონდიდან, სავაჭრო ცენტრ ბავშვთა სამყაროში გაჩენილი ხანძრის შედეგად დაზარალებულთათვის თიბისი ბანკი-ში ამ მიზნით გახსნილ სპეციალურ ანგარიშზე 1 035 000 ლარი გადაირიცხება.

მერიის ცნობით, დაზარალებულები თანხის აღებას 13 აპრილს, 15 საათიდან თიბისი ბანკის სამ ფილიალში შეძლებენ:

  • ცენტრალურ ფილიალში - ჭავჭავაძის #11-ში;
  • მარჯანიშვილის ფილიალში - მარჯანიშვილის #7-ში;
  • დიდუბის ფილიალში - წერეთლის #117-ში.

ბავშვთა სამყაროს მეწარმეები შესაბამისი განაცხადის გაფორმებისა და პირადობის დამადასტურებელი მოწმობის წარდგენის შემდეგ 3 ათას ლარს, ერთჯერადი დახმარების სახით, ნაღდი ანგარიშსწორებით მიიღებენ.

თბილისის ბიუჯეტის სარეზერვო ფონდიდან დახმარება საერთო ჯამში 345 დაზარალებულს გაეწევა.

თბილისში, სავაჭრო ცენტრ ბავშვთა სამყაროში 30 იანვარს, გამთენიისას გაჩენილი ხანძრის შედეგად სრულიად განადგურდა შენობა, დაზარალდა ათობით მოვაჭრე, რომლებსაც სავაჭრო ცენტრში და მის მიმდებარე ბაზრობებზე ტანსაცმლის, ავეჯის, ოქრო-ვერცხლის მაღაზიები ჰქონდათ.