ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, ჟოზეფ ბორელი შარლ მიშელის შეთანხმებაზე ხელმომწერ პარტიებს საპასუხო წერილს უგზავნის და სასამართლო სისტემისა და საარჩევნო რეფორმების შეფერხების გამო შეშფოთებას იზიარებს. წერილში ბორელი აღნიშნავს, რომ ევროკავშირი იმ პარტნიორების დახმარებას გააგრძელებს, რომლებიც რეფორმების განხორციელებისთვის მზად არიან.

მისივე თქმით, ინკლუზიური რეფორმების დროული მიღება და განხორციელება ხელშესახები პროგრესის საუკეთესო შანსად რჩება დემოკრატიისა და მდგრადობის შემდგომი შენებისა და მავნე პოლარიზაციის დასრულების საქმეში, რომელიც ამჟამად ქართულ პოლიტიკურ სისტემაზე ახდენს გავლენას.

"განსაკუთრებული ყურადღება მართლმსაჯულებასა და დემოკრატიულ რეფორმებს უნდა მიექცეს. მიუხედავად იმისა, რომ უპირველესი პასუხისმგებლობა მთავრობას ესკირება, უაღრესად მნიშვნელოვანია, მთავრობამ და ოპოზიციამ დეესკალაციასა და კონსტრუქციული რეფორმების განხორციელებაში ერთობლივი წვლილი შეიტანონ", — ნათქვამია წერილში.

მისივე თქმით, როგორც 15 დეკემბრის აღმოსავლეთ პარტნიორობის სამიტის ერთობლივ დეკლარაციაშია ასახული, ევროკავშირისა და საქართველოს თანამშრომლობის ფარგლები და სიღრმე სხვა ასპექტებთან ერთად, რეფორმების ტემპითა და ხარისხით განისაზღვრება.

"ევროკავშირის პირობითობაზე და სტიმულირებაზე დაფუძნებული მიდგომა (მეტი-მეტისთვის და ნაკლები-ნაკლებისთვის) იმ პარტნიორების უმეტესობის დახმარებას გააგრძელებს, რომლებიც რეფორმების განსახორციელებლად მზად იქნება", — ვკითხულობთ წერილში.

ბორელის, ასევე, ამბობს, რომ საქართველოს მოსახლეობის სასარგებლოდ ევროკავშირი ევროკავშირ-საქართველოს ასოცირების შეთანხმების საფუძველზე, ამბიციური რეფორმების ადვოკატირებას გააგრძელებს.

9 დეკემბერს 19 აპრილის შეთანხმებაზე ხელმომწერმა ოპოზიციის წარმომადგენლებმა ევროპული საბჭოს პრეზიდენტ შარლ მიშელს, ევროკავშირის საგარეო საქმეთა და უსაფრთხოების პოლიტიკის უმაღლეს წარმომადგენელ ჯოზეფ ბორელსა და ევროკომისარს სამეზობლო და გაფართოების საკითხებში ოლივერ ვარჰელს ოფიციალური წერილით მიმართეს და ქვეყანაში ბოლო დროს განვითარებულ პოლიტიკურ მოვლენებთან დაკავშირებით შეშფოთება გაიზაირეს.

გაიგე მეტი: