შრომის ინსპექციაში აცხადებენ, რომ შეხვდნენ ღამის კლუბების წარმომადგენლებს და შეთანხმდნენ, რომ მუშაობის განახლებაზე მათთან ერთად იმსჯელებდნენ. უწყებაში განმარტავენ, რომ კლუბების გახსნასთან დაკავშირებით გადაწყვეტილებას საკოორდინაციო საბჭო ერთობლივი განხილვების შემდეგ მიიღებს.

"მიღწეულია შეთანხმება, რომ მოხდება ღამის კლუბების ფუნქციონირების აღდგენასთან დაკავშირებული უსაფრთხოების პროტოკოლის და შესაძლო გახსნის პროცედურების, ეპიდემიოლოგიური სიტუაციის ანალიზისა და შეფასებასთან ერთობლიობაში განხილვა, რომლის საფუძველზეც, უწყებათაშორისი საკოორდინაციო საბჭოს მიერ, მიღებული იქნება საბოლოო გადაწყვეტილება კლუბების ფუნქციონირების აღდგენის შესაძლებლობასთან დაკავშირებით.

მნიშვნელოვანია, რომ საბოლოო გადაწყვეტილება მიღებული იქნება ყველა შესაძლო რისკის, განსაკუთრებით ახალი, ომიკრონ შტამის სწრაფი გავრცელების შესაძლებლობის და შესაბამისი უსაფრთხოების ზომების მაქსიმალური უზრუნველყოფის განსაზღვრის შედეგად", — აცხადებენ ინსპექციაში.

შეხვედრის შემდეგ განცხადება გაავრცელეს კლუბების წარმომადგენლებმაც. მათ დაგეგმილი ღონისძიებები ერთი კვირით გადადეს და განაცხადეს, რომ "ეს ბოლო შესაძლო კომპრომისია".

17 დეკემბერს, შრომის ინსპექციამ გაავრცელა განცხადება, რომ ღამის კლუბებში ღონსიძიებების გამართვა ამ ეტაპზე აკრძალულია. მათივე განმარტებით, მიმდინარეობს მუშაობა ე.წ. ღამის კლუბების უსაფრთხოების პროტოკოლის პროექტის შემუშავებაზე, რომელიც უწყებათაშორის საკოორდინაციო საბჭოს წარედგინება და მიღებული იქნება შესაბამისი გადაწყვეტილება.

ინსპექციის განცხადებას ღამის კლუბების დამფუძნებლები გამოეხმაურნენ. კლუბ მტკვარზეს დამფუძნებლის, ქეთა გაბუნიას განცხადებით, მთავრობამ დიდი ხანია იცის, რომ კლუბები 17-18 დეკემბერს გეგმავდნენ გახსნას. მისი თქმით, პასუხს ელოდნენ, რადგან წინა ორი საკოორდინაციო საბჭო 2-ჯერ გადაიდო ჯერ მინისტრის გადადგომის და შემდეგ პრემიერის მივლინების გამო.

მწვანე პასპორტების ამოქმედების მიუხედავად, კლუბების მუშაობა ჯერ დაშვებული არ არის. 4 დეკემბერს შრომის ინსპექციამ კლუბი ხიდი 10 000 ლარით დააჯარიმა და დალუქა. კლუბის წარმომადგენლებმა "ესკალაციის თავიდან აცილების მიზნით", ტერიტორია დატოვეს, თუმცა პასუხისმგებელ პირებს "გონივრულ ვადა" მისცეს, რათა მათი მუშაობა დაუშვან. მათი თქმით, სხვა შემთხვევაში, "მხოლოდ წინააღმდეგობას მიიღებენ".