"რატომ გაქვთ ეგეთი აგრესია ჯვართან?", — ასე მიმართა თბილისის მერმა, კახა კალაძემ ჟურნალისტს, რომელმაც მას ჰკითხა, რატომ არ იღებს მერია მოძალადე ჯგუფების მიერ პარლამენტის წინ დადგმულ ჯვარს.

"ქრისტიანები ვართ, მართლმადიდებლები ვართ. მე არ მახსოვს, თქვენი მხრიდან, მოსულიყავით და დაგესვათ ჩემთვის შეკითხვა, როდესაც ის ძუნძგლიანი კარვები იყო და აყროლებული ჰქონდათ რუსთაველი, არასდროს არ მოსულხართ ჩემთან და არ დაგისვამთ შეკითხვა, რატომ არ ვიღებთ კარვებს", — განაცხადა მან.

ჟურნალისტის კითხვაზე, არის თუ არა ერთი და იგივე კარავი და ჯვარი, კალაძე პასუხობს:

"რომ არ არის ერთი და იგივე, ზუსტად იმიტომ უნდა იყოს ჯვარი იქ".

თბილისის მერმა აღნიშნულზე 3 დეკემბერსაც ისაუბრა და აღნიშნა, რომ "არანაირი კონსტრუქცია არ მოიხსნება". კონსტრუქციის იმ ფორმით ყოფნა, კალაძის აზრით, სეკულარულ სახელმწიფოში არასწორი არ არის.

სამოქალაქო აქტივისტმა ნატა ფერაძემ სოციალურ ქსელში პოსტი გამოაქვეყნა სადაც წერდა, რომ პარასკევს, 3 დეკემბერს მერია ჯვრის კონსტრუქციის მოხსნას აპირებდა. თუმცა, ამის შემდეგ, კიდევ ერთი პოსტი გამოაქვეყნა. მისი თქმით, არ ფიქრობდა "ბაბლი" ასე დაიჯერებდა.

"რა თქმა უნდა, მერია არ აპირებს აღებას, ამას რომ ვწერდი, არ ველოდი, რომ ბაბლი ასე დაიჯერებდა, რომ კალაძე სეკულარულ ღირებულებებზე ზრუნავს და ამას გაბედავდა. ბოდიში, ვინც დაიტროლეთ, მაგრამ კიდე ერთხელ გამოჩნდა, სად მივექანებით. კონსტრუქცია დამონტაჟებულია ყველა კანონის უგულებელყოფით და არანაირი უფლება არ აქვს, იდგეს იქ. აგრესიული მრევლის მუქარით დაშინებული კანონმდებელი დუმს", — წერს ნატა ფერაძე.

ჯვარი ძალადობრივმა ჯგუფებმა და საპატრიარქოს სასულიერო პირებმა 5 ივლისს დადგეს. ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.