ექსპრეზიდენტ მიხეილ სააკაშვილის ადვოკატებმა პროკურორ გიორგი მუჯირის აცილება მოითხოვეს. ე.წ. პიჯაკების საქმის განხილვისას, პროკურორის სიტყვით გამოსვლის შემდეგ ადვოკატმა ნიკა გვარამიამ განაცხადა, რომ ის პოლიტიკურად იყო მოტივირებული.

"ეს განცხადებები არ შეეხება ბრალდებას, ეს განცხადებები არის პოლიტიკური შინაარსის, ვინაიდან ხდება წინა პოლიტიკური კონტექსტის შეფასება და აქედან გამომდინარე უკვე გადადის საქმის მასალებზე. ანუ, რეალურად ეს არის პოლიტიკური და მორალური შეფასება მიხეილ სააკაშვილის, რისი უფლებაც არ გააჩნია ბრალდების მხარეს, კონკრეტულად ბატონ მუჯირს და ამიტომ, ვითხოვ მის აცილებას აღნიშნული პროცესიდან", — მიმართა გვარამიამ მოსამართლეს.

პროკურორის სიტყვა შეეხებოდა კონრეტულ თარიღებისა და მოვლენების აღწერას, რომლის შემდეგაც, ბრალდების მხარის მტკიცებით, სააკაშვილმა ბიუჯეტის ხარჯზე "კოსმეტიკური პროცედურები" ჩაიტარა

"2011 წლის 26 მაისს, მაშინ, როდესაც თბილსიში, რუსთაველის გამზირზე პოლიციის უკანონო ქმედებებით დასახიჩრდა და რეალურად, ჯანმრთელობის დაზიანება მიიღო უამრავმა ადამიანმა და მასობრივად დააკავეს ხალხი, მესამე დღეს მიხეილ სააკაშვილი მიემგზავრება ნიუ-იორკში, შემდეგ ბრუნდება ევროპაში, სადაც იტარებს კოსმეტიკურ პროცედურებს [...]

ორთაჭალაში, მსგავსი ფაქტიც არის, როდესაც წყალდიდობა მოხდა და 5 ადამიანიც კი ემსხვერპლა ამას, ის უკვე მომდევნო დღეს მიდის საზღვარგარეთ და ისევ იღებს იმ ფუფუნების საგნებსა თუ მომსახურებას, რაც ამ 9 მილიონ ლარში მრავლად არის წარმოდგენილი", — განაცხადა პროკურორმა გიორგი მუჯირმა.

გვარამიას შეფასებით, პროკურორის სიტყვა შეიცავს ისეთ ფაქტების აღწერას, რომელიც საქმესთან კავშირში არ არის. სააკაშვილის კიდევ ერთმა ადვოკატმა, ბექა ბასილაიამ გაიხსენა გიორგი მუჯირის საჯარო გამოსვლები მედიაში, სადაც, მათი თქმით, პროკურორი საუბრობს საკითხებზე, რომლებზეც საქმის განხილვისას არასდროს უსაუბრია. ადვოკატების შეფასებით, პროკურორის განცხადებები მიზნად ისახავს, ნეგატიური ფონის შექმნას მაყურებლის წინაშე.

თავად გიორგი მუჯირმა დაცვის მხარის შუამდგომლობა "სამართლებრივი აბსურდი" უწოდა. მისი თქმით, ის უბრალიდ ფაქტებს კონსტანტაციას ახდენდა კონრეტული თარიღების მითითებით.

ამ წუთებში თბილისის საქალაქო სასამართლოში, მოსამართლე ბადრი კოჭლამაზიშვილი ე.წ. პიჯაკების საქმეს განიხილავს. სხდომას ესწრება თავად მიხეილ სააკაშვილიც.