ქართული ოცნების თავმჯდომარე, ირაკლი კობახიძე ამტკიცებს, რომ ტყუილია, თითქოს ჯანდაცვის მინისტრი ეთანხმება მოსაზრებას, ექსპრეზიდენტის სამოქალაქო კლინიკაში გადაყვანაზე. მისი თქმით, ეკატერინე ტიკარაძე გააკეთებს ამის შესახებ განცხადებას.

"რაც შეეხება ე.წ. კონსილიუმს, რომელმაც განსხვავებული ინფორმაცია გაავრცელა, აქედანაც ჩანს, რომ ეს ე.წ. კონსილიუმი თვითონ არის "ფეიკი" და ავრცელებს "ფეიკებს" ტიკარაძის განცხადებასთან დაკავშირებით. ტყუილია კი", — განაცხადა მან.

გუშინ, 18 ნოემბერს სახალხო დამცველის ინიციატივით შემქნილი სამედიცინო ექსპერტთა ჯგუფის წევრმა, ანესთეზიოლოგ-რეანიმატოლოგმა, გიორგი გრიგოლიამ განაცხადა, რომ ჯანდაცვის მინისტრმა, ეკატერინე ტიკარაძემ გაიზიარა მათი არგუმენტები სააკაშვილის სამოქალაქო კლინიკაში გადაყვანაზე. მისი ინფორმაციით, სააკაშვილის ჯანმრთელობის მონიტორინგისთვის შექმნილი ორი კონსილიუმი — იუსტიციის სამინისტროსა და სახალხო დამცველის ინიციატივით შეკრებილი კონსილიუმები — ერთმანეთს სწორედ ტიკარაძის ინიციატივით შეხვდნენ. გრიგოლიას თქმით, ორივე კონსილიუმი თანხმდება, რომ სააკაშვილის ციხის საავადმყოფოში დარჩენა მიზანშეწონილი არ არის.