ყოფილი პრეზიდნტი, მიხეილ სააკაშვილი აცხადებს, თუ აშშ მას არ დაიცავს, ამით ცუდ სიგნალს გუგზავნის პროდასავლური ლიდერებს. გამოცემა Bloomberg-ისთვის გაგზავნილ წერილში სააკაშვილი, საქართველოში დაბრუნების მიზეზად "რუსული თამაშებისა" და საქართველოს მთავრობის განცხადებებს ასახელებს, რომელმაც, მისი თქმით, დაარწმუნა, რომ ქვეყანა უარს ამბობს ევროკავშირსა და ნატოში ინტეგრაციის გზაზე.

"თუ აშშ ჩემს დასაცავად ნაბიჯს არ გადადგამს, ეს იქნება საშინელი სიგნალი ყველა პროდასავლური ლიდერისთვის და მოსახლეობისთვის", — ამბობს სააკაშვილი.

მიხეილ სააკაშვილი 50-ე დღეა შიმშილობს. მისი ადვოკატები, ოპოზიცია და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

18 იანვარს მიხეილ სააკაშვილის ადვოკატმა, ბექა ბასილაიამ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა და გადააწვინეს საწოლზე". ამასთან, მან თქვა, რომ ხელით გაუხსნეს თვალები. ამის შემდეგ პენიტენციურმა გაავრცელა განცხადება და თქვა, რომ სააკაშვილის მდგომარეობა სტაბილურია. ექსპრეზიდენტის მონახულების შემდეგ, რეანიმატოლოგმა გულიკო ქილიფთარმა განაცხადა, იგი რეანიმაციაშია. მისივე თქმით, პაციენტს ჰქონდა მაღალი წნევა. მოგვიანებით მის სანახავად სხვადასხვა პროფილის ექიმები შევიდნენ. ისინი ამბობენ, რომ სააკაშვილის სასიცოცხლო პარამეტრები გამოსწორებულია, თუმცა მოსალოდნელია სიტუაციის გართულება, რომლის მართვის რესურსი ციხის საავადმყოფოში არ არსებობს.