წამების მსხვერპლთა რეაბილიტაციის საერთაშორისო ცენტრი გმობს მიხეილ სააკაშვილის მიმართ არასათანადო მოპყრობას, მას შემდეგ, რაც ხელისუფლებამ მოშიმშილე პატიმარი თავისი ნების საწინააღმდეგოდ ციხის სამკურნალო დაწესებულებაში გადაიყვანა. IRCT-ის შეფასებით, იქ ექსპრეზიდენტის სიცოცხლეს საფრთხე ემუქრება.

"ჩვენ ძალიან შეშფოთებულები ვართ წამების გამწვავებული საფრთხის გამო, რომლის წინაშეც ყოფილი პრეზიდენტი დგას. მკაცრად მოვუწოდებთ სახელმწიფოს, რომ პატივი სცეს და დაიცავს ადამიანის ფუნდამენტურ უფლებები", — განაცხადა IRCT-ის გენერალურმა მდივანმა, ლიზა ჰენრიმ.

ორგანიზაცია შეფასებისას ომბუდსმენის განცხადებას ეყრდნობა, სადაც სახალხო დამცველი საუბრობს, რომ სააკაშვილის გლდანის დაწესებულებაში გადაყვანა მისი ნების საწინააღმდეგოდ მოხდა. ამასთან, მათ განცხადებაში აღნიშნული აქვთ, რომ მიუხედავად ბოლო კვირაში სააკაშვილის მხარდასაჭერად გამართული აქციებისა, პრეზიდენტმა, სალომე ზურაბიშვილმა კვლავ უარი განაცხადა მის შეწყალებაზე, რადგან სჯერა, რომ ყოფილი პრეზიდენტი საქართველოში "დესტაბილიზაციის" მიზნით დაბრუნდა.

პენიტენციურმა სამსახურმა გაავრცელა კადრები, სადაც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ.

თავდაპირველად, ვიდეოში ჩანს, რომ ექსპრეზიდენტი ათამდე ბადრაგმა სასწრაფო დახმარების მანქანიდან იძულებით, მისი სურვილის წინააღმდეგ გადმოიყვანა, შენობაში და შემდეგ ლიფტში, ასევე, ძალის გამოყენებით, ხელში აყვანილი შეიყვანა, რა დროსაც მას ტანსაცმელი თითქმის გახდილი აქვს.

ექსპრეზიდენტი ციხის საავადმყოფოს პალატაში უკვე წელსზევით შიშველი შეჰყავთ და პირდაპირ იატაკზე სვამენ. ვიდეოს არ აქვს ხმა, თუმცა ჩანს, რომ უკვე პალატაში სააკაშვილი ჩხუბობს და სამედიცინო ხელსაწყოს იატაკზე აგდებს. სიტყვიერი დაპირისპირების დროს, კადრებში ჩანს, რომ სააკაშვილი პალატაში მყოფი პირისკენ გაიწია, თუმცა ხელი არ დაურტყამს.

მისდამი ასეთ მოპყრობაზე სააკაშვილმა იმ დღესვე ისაუბრა, როდესაც გლდანის ციხეში გადაიყვანეს. გავრცელებულ წერილში ის იქ შეყვანის დეტალებს აღწერს. სააკაშვილის თქმით, მისი წინააღმდეგობის მიუხედავად, იძულებით შეიყვანეს გლდანის მე-18 დაწესებულებაში, კრიმინალების გინების ქვეშ გაათრიეს მიწაზე, ჩაარტყეს კისერში, ათრიეს თმებით, რა დროსაც წინააღმდეგობა გაუწია.