მთავარი არხის ჟურნალისტები, დეა მამისეიშვილი და გიორგი ახალკაცი ამბობენ, რომ პროფესიული საქმიანობის გამო ემუქრებიან.

მამისეიშვილმა ფეისბუქგვერდზე გამოაქვეყნა შეტყობინებების სქრინები, რომელშიც, სავარაუდოდ, ყალბი ექაუნთიდან წერენ. შეტყობინების ავტორი ამბობს, რომ ქართულ ოცნებაში "ახალაიები და კოდუები დაიბადნენ" და მამისეიშვილს ემუქრებიან. შეტყობინებაში ასევე არის მუქარა იმ ადამიანებისა და მათი ოჯახების მიმართ, ვისაც ოპოზიციის დაანონსებული აქცია გაუხარდა.

იმ პირის ვინაობა, ვინც მამისეიშვილს ემუქრება უცნობია, Facebook პროფილი კი ამ დროისთვის აღარ იძებნება.

Facebook-ზე პოსტი გამოაქვეყნა გიორგი ახალკაცმაც. მისი თქმით, ყოფილი მოჭიდავე "რაზბორკაზე" იბარებს. შეტყობინების ავტორი მას სიტყვიერ შეურაცხყოფას აყენებს და შეხვედრას სთავაზობს.

On.ge დაუკავშირდა შინაგან საქმეთა სამინისტროს კითხვით, დაიწყეს თუ არა გამოძიება. პასუხს მიღებისთანავე შემოგთავაზებთ.