ბათუმში კორპუსის ნგრევის შემდეგ გადარჩენილი ერთადერთი ადამიანი, ზვიად თავდგირიძე საავადმყოფოდან გაწერეს. ინფორმაციას ამის შესახებ და ექიმებთან ერთად გადაღებულ ფოტოს ნათელა დავითაძე ავრცელებს.

ზვიად თავდგირიძე ნანგრევებიდან დაახლოებით 12 საათის შემდეგ ამოიყვანეს. ის მთელი ამ პერიოდის განმავლობაში მაშველებს ეკონტაქტებოდა. კლინიკა მედცენტრში გადაყვანის შემდეგ კაცის მდგომარეობა მძიმე იყო და მოგვიანებით დასტაბილურდა. 14 ოქტომბერს ის რეანიმაციული განყოფილებიდან პალატაში გადაიყვანეს.

8 ოქტომბერს, ბათუმში, 26 მაისის ქუჩაზე საცხოვრებელი კორპუსი ჩამოინგრა. დაღუპულია 9 ადამიანი, მათ შორის 3 ბავშვი.

პოლიციამ სამშენებლო უსაფრთხოების წესების დარღვევის ბრალდებით სამი ადამიანი დააკავა. პროკურატურის ინფორმაციით, ბრალდებულებმა მოშალეს როგორც არამზიდი, ასევე, მზიდი კონსტრუქცია (კედლები), რითაც საცხოვრებელი კორპუსის სიმტკიცე და მდგრადობა დაირღვა და ამან შვიდსართულიანი კორპუსის ნგრევა გამოიწვია. უწყება ამბობს, რომ სამშენებლო სამუშაოები თვითნებურად, საინჟინრო და უსაფრთხოების წესების დარღვევით, შესაბამისი საინჟინრო ცოდნის მქონე სპეციალისტის მონაწილეობისა და სახელმწიფოს ნებართვის გარეშე მიმდინარეობდა.