პოლონეთის საგარეო საქმეთა სამინისტროში პოლონეთში საქართველოს ელჩის მოvალეობის შემსრულებელთან ექსპრეზიდენტ მიხეილ სააკაშვილის ჯანმრთელობის მდგომარეობის გაუარესება განიხილეს. ამის შესახებ ინფორმაციას პოლონეთის საგარეო საქმეთა სამინისტროს მიერ Twitter–ზე ავრცელებს.

"დღეს პოლონეთის საგარეო საქმეთა სამინისტროში პოლონეთში საქართველოს ელჩის მოვალეობის შემსრულებელთან დაპატიმრების შემდეგ მიხეილ სააკაშვილის ჯანმრთელობის მდგომარეობის გაუარესების საკითხი განვიხილეთ. გამჭვირვალობა, კანონის უზენაესობის დაცვა და პოლიტიკური მოქმედებებისგან თავის შეკავება მნიშვნელოვანია თბილისის ევროატლანტიკური მისწრაფებების მისაღწევად", — წერია გამოქვეყნებულ განცხადებაში.

მიხეილ სააკაშვილი 14 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციურმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.