ისრაელში სწავლა საკლასო ოთახებში განახლდა. ინფორმაციას ამის შესახებ Times of Israel ავრცელებს და აცხადებს, რომ 2,5 მილიონამდე მოსწავლემ, საბავშვო ბაღიდან მე-12 კლასის ჩათვლით, ვირუსის გავრცელების რეკორდული რაოდენობის მიუხედავად, სასწავლო წელი საკლასო ოთახებში დაიწყო.

მედიის ცნობით, ისრაელის ჯანდაცვის სამინისტროს გენერალურმა დირექტორმა, ნაჩმან აშმა თქვა, რომ მათთვის პრიორიტეტი ეკონომიკის გახსნა და ბავშვების სკოლაში დაბრუნება იყო. ამასთან, გამოცემის განცხადებით, მას არ გამოურიცხავს, რომ სკოლების გახსნა, სავარაუდოდ, შემთხვევების მატებას გამოიწვევს, თუმცა აქვე იმედი გამოთქვა, რომ დაწესებული შემზღუდავი ზომები, კორონავირუსის გავრცელების რისკს შეამცირებს.

გამოცემის ინფორმაციით, განათლების მინისტრმა სამშაბათს, 31 აგვისტოს გამართულ პრესკონფერენციაზე სკოლის გახსნის მნიშვნელობაზე ისაუბრა და აღნიშნა, რომ საჭირო იქნება საკლასო ოთახებში სწავლების აღდგენის ახალი პროგრამის შემთხვევების რაოდენობის მიხედვით ადაპტირება. მანვე აღნიშნა, რომ განათლების სისტემა არის გამოსავალი და არა პრობლემა.

"ვიცი, რომ ეს არ იქნება მარტივი, მაგრამ ჩვენ გვაქვს მორალური ვალდებულება, რომ ბავშვები სკოლაში დავაბრუნოთ. ჩვენ ვალდებული ვართ მათთან, როგორც საზოგადოებასთან [...] ჩვენ ერთად შევიმუშავეთ პროგრამა, რომელიც მოსწავლეების უსაფრთხოდ დაბრუნებას უზრუნველყოფს. არ დავაყოვნებთ, რომ რეალობის ცვლილებიდან გამომდინარე მისი ადაპტაცია მოვახდინოთ", — განაცხადა მინისტრმა.

მინისტრმა არ გამორიცხა შესაძლებლობა, რომ ვირუსის გავრცელების შემთხვევაში სკოლები დაიხუროს, როგორც ეს შარშან რამდენჯერმე მოხდა.

განათლების სამინისტროს განახლებული გაიდლაინების თანახმად, ყველას, ვინც შევა სკოლაში ან საბავშვო ბაღში, მოუწევს წარმოადგინოს კოვიდპასპორტი ან კორონავირუსის ტესტის უარყოფითი შედეგი.

მედიის განცხადებით, ისრაელმა მილიონ მოსახლეზე ერთი კვირის მონაცემებით საქართველოსა და მონტენეგროს გადაუსწრო. საშუალოდ ეს რაოდენობა ისრაელში 1 013-ია. ამასთან, ჯანდაცვის სამინისტროს ინფორმაციით, ორშაბათს ისრაელში კორონავირუსის 11 077 ახალი შემთხვევა დაფიქსირდა, რაც მათი ცნობით, პირველი შემთხვევაა, როცა ისრაელში პანდემიის დაწყებიდან დღემდე დღიური შემთხვევების რაოდენობა 11 ათასს გადასცდა.