ქართული ოცნების თავმჯდომარე, ირაკლი კობახიძე ამტკიცებს, აქვს "სტანდარტული რეიტინგი" რაც შეიძლება ჰქონდეს დეპუტატს, თუმცა ამატებს, რომ ეს ყველაზე მაღალია პარლამენტარებს შორის.

"მე მაქვს სტანდარტული რეიტინგი, რაც შეიძლება ჰქონდეს პარლამენტის წარმომადგენელს. აქ არის სერიოზული სპეციფიკა. ყველა ქვეყანაში, ზოგადად, აღმასრულებელი ხელისუფლების წარმომადგენლებს, როგორც წესი, აქვთ უფრო მაღალი რეიტინგი, ვიდრე საკანონმდებლო ხელისუფლების წარმომადგენლებს.

რაც შეეხება თვითონ პარლამენტის წრეს, ყველაზე მაღალი რეიტინგი პარლამენტარებს შორის მაქვს მე, მაგრამ, განსხვავებით აღმასრულებელი ხელისუფლების წარმომადგენლებისგან, იგივე რომ ავიღოთ კახი კალაძე, რომელიც არის ყველაზე რეიტინგული მერი და ა.შ. მათ აქვთ უფრო მაღალი რეიტინგი, რასაც განაპირობებს სხვადასხვა ფაქტორი", — განაცხადა კობახიძემ პალიტრანიუსის ეთერში.

ჟურნალისტის კითხვას, მაინც რამდენია ეს "სტანდარტული" თუმცა სხვებს შორის ყველაზე მაღალი რეიტინგი, კობახიძემ უპასუხა, რომ ეს "რა თქმა უნდა, ორნიშნაა".

"რა თქმა უნდა ორნიშნაა. ეს ქვეყნდება პერიოდულად. შეგვიძლია ჩვენც გამოვაქვეყნოთ ჩვენი მონაცემები. დაახლოებით 30% არის [ჩემი] რეიტინგი, მაშინ, როდესაც კახი კალაძეს აქვს, მაგალითად, 40-50%-მდე. ეს ნორმალურია. 30% ითვლება, რომ არის მაღალი რეიტინგი საკანონმდებლო ორგანოს წარმომადგენლებისთვის. მეც მაქვს დაახლოებით ასეთი რეიტინგი", — განაცხადა კობახიძემ.

კობახიძემ მისი და პარტიის გენერალური მდივნის, კახა კალაძის რეიტინგები მას შემდეგ შეადარა ერთმანეთს, რაც ჟურნალისტმა ჰკითხა, მისმა დაბალმა პერსონალურმა რეიტინგმა ხომ არ განაპირობა, რომ პარტიის საარჩევნო კამპანიაში აქტიურად არ არის ჩართული. ამ მოსაზრებას კობახიძემ სპეკულაცია უწოდა და აღნიშნა, რომ რომ მსგავსი "სპეკულაციები" ვრცელდებოდა მის გადადგომასთან დაკავშირებითაც. ამის მიზეზად ის პარტიისთვის ჩრდილის მიყენების მცდელობას ასახელებს.

გაიგე მეტი: