სახალხო დამცველის აპარატის წარმომადგენლის, ციალა ქათამიძის ინფორმაციით, ბათუმში 11 მარტის ღამით დაწყებული არეულობისას და მისი დასრულების შემდეგ, 75 ადამიანი დააკავეს.

"ჩვენი წარმომადგენელები იყვნენ ყველა იმ ადგილას, სადაც შესაძლოა ყოფილიყვნენ აქციის განმავლობაში დაკავებული პირები. ვიყავით იზოლატორში, სამმართველოში, განყოფილებებში და საპატრულო პოლიცის შენობაში. ჩვენ ვითხოვდით აქციის განმავლობაში დაკავებული პირების შესახებ ინფორმაციას და გვაძლევდნენ," - აღნიშნა ქათამიძემ On.ge-სთან საუბრისას.

მისი ინფორმაციით, ამ ეტაპზე, ადმინისტრაციული სამართალდარღვევისთვის მხოლოდ შვიდ ადამიანს აქვს ხუთდღიანი პატიმრობა მისჯილი.

11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.

პრემიერმინისტრმა გიორგი კვირიკაშვილმა მომხდარში "დესტრუქციული პოლიტიკური ძალები" დაადანაშაულა. ის არეულობის მონაწილეებს დაჰპირდა, რომ სახელმწიფო მათ უმკაცრეს პასუხს გასცემს.