საქართველოს პრემიერმინისტრის, ირაკლი ღარიბაშვილის შეფასებით, ბოლო 30 წლის განმავლობაში პირველად არის ქვეყანაში სიმშვიდე და სტაბილურობა. პრემიერმა ეს განცხადება ქობულეთში, მერობის კანდიდატის წარდგენისას გააკეთა.

"ეს არის ერთ-ერთი, ერთადერთი, ასე ვიტყოდი, გამონაკლისი ბოლო 30 წლის განმავლობაში, ანუ მას შემდეგ, რაც ჩვენ აღვადგინეთ დამოუკიდებლობა, როცა ქვეყანაში გვაქვს მართლაც უწყვეტი მშვიდობა და სტაბილურობა. და მე არაერთხელ მითქვამს მეგობრებო, მშვიდობის გარეშე, სტაბილურობის გარეშე, მითხარით ერთი, რა შეიძლება რომ განვითარდეს ქვეყანაში? არაფერი", — თქვა ღარიბაშვილმა.

ქვეყანაში უწყვეტ მშვიდობაზე ღარიბაშვილმა 14 აგვისტოსაც ისაუბრა და ეს ბიძინა ივანიშვილის ხელისუფლების დამსახურებად მოიხსენია.