პრემიერმინისტრი ირაკლი ღარიბაშვილის განცხადებით, საკოორდინაციო საბჭო ხვალ ახალი რეგულაციების შესახებ ინფორმაციას გააჟღერებს. მისი თქმით, ეს შეეხება პირბადის ტარების წესს.

"წინასწარ არ მსურს ამის თაობაზე ვისაუბრო. ხვალ ჩვენ გვექნება კოვდისაბჭო, ტრადიციული საბჭო სამშაბათის ნაცვლად გადმოვწიე, ხვალ ჩატარდება 12 საათზე. ვიმსჯელებთ, მათ შორის, ფესტივალებისა და ფართომასშტაბიანი ღონისძიებების რეგულაციებთან დაკავშირებით. ამის თაობაზე ხვალ შეგატყობინებთ", — განაცხადა მან.

ღარიბაშვილი ამბობს, რომ შეზღუდვებს არ გეგმავენ და ძირითადად საუბარი იქნება რეგულაციებზე, რომელიც მოსახლეობას გაუადვილებს პანდემიის მართვას და არ შეზღუდავს ეკონომიკას

უცნობია რას გულისხმობს ღარიბაშვილი ფართობმასშტაბიან ღონისძიებებში, გუშინ, 7 აგვისტოს ის თავად ესწრებოდა ხალხმრავალ ქეიფს, სადაც რეკომენდაციები არ იყო დაცული, თავად პრემიერი კი აუცრელი იყო.

ქვეყანაში ეპიდემიოლოგიური მდგომარეობა სულ უფრო და უფრო მძიმდება. ინფიცირების ყოველდღიური მაჩვენებელი ბოლო პერიოდში 4 ათასს აჭარბებს. ამ ეტაპზე საქართველოში კორონავირუსის მეოთხე ტალღაა და სწორედ დღეს, ჯანდაცვის მინისტრის მოადგილემ, თამარ გაბუნიამ განაცხადა, რომ პიკის დაღმასვლა ჯერ არ შეინიშნება. ამ ფონზე საკოორდინაციო საბჭო, რომელსაც თავად პრემიერმინისტრი, ირაკლი ღარიბაშვილი ხელმძღვანელობს, მუდმივად მოუწოდებს მოსახლეობას რეკომენდაციების დაცვისკენ, რაც სოციალურ დისტანციას და ხალხმრავალი შეკრებებისგან თავის არიდებას გულისხმობს. უფრო მეტიც, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ განაცხადა, რომ განიხილება დიდი თავშეყრების აკრძალვაც.