დაავადებთა კონტროლის ეროვნული ცენტრის თანახმად, საქართველოში საერთო ჯამში აცრილთაგან 67% ქალია და 33% კაცი. ამის შესახებ საუბარია NCDC-ის ანგარიშში, რომელიც ვაქცინაციაზე 15 მარტიდან 15 ივლისის პერიოდს მოიცავს.

ფოტო: ncdc

გარდა ამისა, NCDC-ის ცნობით, ჯანდაცვის სექტორში დასაქმებული პერსონალიდან 15 ივლისისათვის სულ აცრილია 16 486 მუშაკი.

ფოტო: ncdc

ანგარიშის თანახმად, საერთო ჯამში ქვეყანაში მოხმარებულია 334 133 დოზა ვაქცინა, სრულად აცრილია 126 739 მოქალაქე, ხოლო მინიმუმ ერთი დოზით აცრილია 207 394 ადამიანი. ერთი დოზით აცრილთა რაოდენობა კი სამიზნე პოპულაციის 12,2%-ს შეადგენს.

ფოტო: NCDC

რაც შეეხება რეგიონებს, NCDC-ის ინფორმაციით, ამ პერიოდისათვის ყველაზე მეტი ადმინისტირებული დოზები არის თბილისში (202 904), აჭარასა (34 848) და იმერეთში (27 262).

ამასთან, ანგარიშის მიხედვით, ჩატარებული აცრების 40% მოდის სინოფარმზე, 26% — ასტრაზენეკაზე, 25% — სინოვაკზე, ხოლო 9% — ფაიზერზე.

ფოტო: ncdc

ანგარიშში ვკითხულობთ, რომ ამ პერიოდამდე საქართველოს მასშტაბით პროგრამაში ჩართული სამედიცინო დაწესებულებები ვაქცინაციას ახორციელებენ 333 ამცრელი ბრიგადით. დღიური გამტარიანობის მაქსიმუმი კი 11 000-მდე აცრას შეადგენს. NCDC-ის განცხადებით, არსებული ადმინისტრირებული რაოდენობის მიხედვით, დღეში კეთდება საშუალლოდ 700 დოზა აცრა ყოველ 100 000 მოსახლეზე, ხოლო აღნიშნული ვაქცინებიდან, სინოვაკისა და სინოფარმის ადმინისტრირება ხდება როგორც პირველადი ჯანდაცვის, ასევე ჰოსპიტალური სექტორის მიერ, ხოლო ასტრაზენეკასა და ფაიზერის ადმინისტრირება ექსკლუზიურად სტაციონარებშია შესაძლებელი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: