TV პირველის ოპერატორის, ლექსო ლაშქარავას სიკვდილს ირანელი და ფრანგი ხელოვანები გამოეხმაურნენ და მის ხსოვნას ნამუშევრები მიუძღვნეს.

"წარმომიდგენია, როგორ ბრაზობთ. იქ სადაც ჰომოფობია და სიძულვილია, ადამიანები უსაფრთხოდ არ არიან", — ამბობს ირანელი ხელოვანი, მერაჯ შარიფი ქართველი ოპერატორის სიკვდილზე.

ფოტო: Meraj Sharifi

ფრანგმა ხელოვანმა ლექსო ლაშქარავას სიკვდილს თბილისში გრაფიტი მიუძღვნა. ამის შესახებ ლიკა ლეჟავა საკუთარ Facebook პოსტში წერს:

"რამდენიმე დღის წინ ფრანგები გავიცანი ფაბრიკაში. გული არ გამიძლებდა რომ არ გამეზიარებინა ყველა ის ემოცია და მწუხარება, რაც გვაქვს. შემპირდნენ, რომ კედელს მოხატავდნენ ლექსოს ხსოვნისთვის. დღეს ფოტო ჩამიგდეს...ორივემ იცოდა ლექსოს ამბავი, მაგრამ მე მეტი მოვუყევი. დამამშვიდეს, რომ ოდესმე აქაც შეიცვლება ყველაფერი", — წერს ლიკა ლეჟავა.

TV პირველის ოპერატორი ლექსო ლაშქარავა 11 ივლისს გარდაიცვალა. ლექსო 50-ზე მეტ ჟურნალისტთაგან ერთ-ერთი იყო, რომელიც ძალადობრივმა და ჰომოფობიურმა ჯგუფებმა 5 ივლისს სცემეს. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. ლექსო რამდენიმე დღე საავადმყოფოში იმყოფებოდა და შემდეგ სახლში გაეწერა.