მიმდინარე წლის პირველი ივნისის მდგომარეობით, საქართველოში კომერციულ ბანკებს 39,5 მილიარდი ლარის სესხი აქვთ გაცემული — ამის შესახებ ინფორმაციას ეროვნული ბანკი ავრცელებს.

მთლიანი დაკრედიტებიდან 20,1 მილიარდი ლარი შინამეურნეობებზე მოდის, ხოლო იურიდიულ პირებზე გაცემული სესხების მოცულობა 19,4 მილიარდი ლარია. ამასთან, სესხების ნახევარზე მეტი (21,5 მილიარდი ლარის ეკვივალენტი) უცხოური ვალუტით არის გაცემული, ხოლო კრედიტების მთლიან მოცულობაში ეროვნული ვალუტის წილი 18 მილიარდი ლარია.

როგორც ეროვნული ბანკის ანგარიშიდან ხდება ცნობილი, მიმდინარე წლის მაისში, გასულ თვესთან შედარებით, კომერციული ბანკების მიერ გაცემული სესხების მოცულობა (ბანკთაშორისი სესხების გარდა) 616,8 მილიონი ლარით შემცირდა. უნდა აღინიშნოს, რომ ეს შემცირება მაისში ეროვნული ვალუტის გამყარებით არის გამოწვეული, რადგან თუ ლარის გაცვლითი კურსის ეფექტს გამოვრიცხავთ, გაცემული სესხების საერთო მოცულობა 1,16%-ით არის გაზრდილი.

უფრო კონკრეტულად, 2021 წლის მაისში, გასულ თვესთან შედარებით, ეროვნული ვალუტით გაცემული სესხების მოცულობა 311,4 მილიონი ლარით (1,76%-ით) გაიზარდა, ხოლო უცხოური ვალუტით გაცემული სესხების მოცულობა 928,2 ლარით (4,14%-ით) შემცირდა (გაცვლითი კურსის ეფექტის გარეშე, გაიზარდა 0,68%-ით).

"რეზიდენტი იურიდიული პირებისათვის 2021 წლის მაისის ბოლოს, კომერციულ ბანკებს ეროვნული ვალუტით გაცემული ჰქონდათ 5,73 მილიარდი ლარის (წინა თვესთან შედარებით 1,5%-ით მეტი), ხოლო უცხოური ვალუტით 13,47 მილიარდი ლარის (წინა თვესთან შედარებით 3,99%-ით ნაკლები) მოცულობის სესხი (გაცვლითი კურსის ეფექტის გარეშე, 0,84%-ით მეტი)", — ნათქვამია სებ-ის ანგარიშში.

მიმდინარე წლის პირველი ივნისისათვის, მთლიანი სესხების ლარიზაციის კოეფიციენტმა 45,6% შეადგინა, რაც 2021 წლის პირველი მაისის მდგომარეობასთან შედარებით, 1,48 პროცენტული პუნქტით არის გაზრდილი. როგორც ცნობილია, ლარიზაციის კოეფიციენტი კომერციული ბანკების მთლიანი სესხებიდან ეროვნული ვალუტით გაცემული კრედიტების წილს აჩვენებს.