ჭიათურაში, გედების ტბაში ძაღლებმა ექვსი გედი დაგლიჯეს. შემთხვევა 16 ივნისს ღამით მოხდა. როგორც On.ge-ს ჭიათურის მერიაში უთხრეს, ტბაში სულ 7 გედი იყო. აქედან 5 ღამით დაიღუპა, ერთ-ერთი კი დღეს.

სოციალურ ქსელში გავრცელდა ფოტოებო, სადაც ჩანს, რომ ერთ-ერთ გედს ჭრილობა პირბადით აქვს შეხვეული. მერიაში ამბობენ, რომ ვეტერინარის მოსვლამდე ჭრილობა პირბადით გედს ერთ-ერთმა ადგილობრივმა გადაუხვია.

ჭიათურის მერიაში, ასევე, გვითხრეს, რომ შემთხვევის შესახებ ყველამ დილით შეიტყო და ვეტერინარიც დღის საათებში გამოიძახეს. ადგილზე მისულმა ვეტერინარმა ერთ-ერთი დაჭრილი გედის გადარჩენა ვერ შეძლო.

გედების ტბა ერთ-ერთი ყველაზე ცნობილი ადგილია ჭიათურაში. ის, დაახლოებით, 50 წელია არსებობს. ამ შემთხვევის შემდეგ მერიამ ტბის ბადით შემოსაზღვრა გადაწყვიტა.

"აქამდე მსგავსი შემთხვევა არ მომხდარა, სწორედ ამიტომ არ იყო შემოღობილი აქამდე, თორემ რა უნდოდა ამის შემოღობას", — ამბობს On.ge-სთან ჭიათურის კეთილმოწყობის სამსახურის უფროსი, ლაშა ტაბატაძე.

მისივე თქმით, უახლოეს მომავალში გედებს ისევ მოამრავლებენ.