ათონელის ქუჩა #29-ში მდებარე სოციალური ბარი, გენერატორი 9.8, შესაძლოა, დაიხუროს ან ადგილი შეცვალოს. ბარის ერთ-ერთი დამაარსებლის ნატა ქენქაძის თქმით, თბილისის განვითარების ფონდმა, 27 თებერვალს შეატყობინა მათ რომ 10 მარტიდან უნდა დაიწყოს სარეაბილიტაციო სამუშაოები ათონელის ქუჩაზე და ერთი წლით უნდა დაიკეტოს დაწესებულება. მისივე თქმით, ფონდს მათთვის არანაირი კომპენსაცია არ შეუთავაზებია:

"ამ ეტაპზე, წარვადგინეთ ფონდების მხარდამჭერი წერილები, რადგან თავიდან გენერატორი 9.8 დაფუძნდა სპორტისა და ახალგაზრდობის სამინსიტროს სსიპ ბავშვთა და ახალგაზრდობის განვითარების ფონდიდან მოპოვებული გრანტით. ასევე, გვაქვს მიმდინარე დაფინანსება GITA-სგან, რომელიც არის ეკონომიკის სამინისტროს სსიპ. სახელმწიფო ბიუჯეტიდან უკვე დახარჯულია დაახლოებით 50 000 ლ გენერატორი 9.8-ს პროექტისთვის. ამ ინფორმაციის მიწოდების შემდეგ, თბილისის განვითარების ფონდმა შემოგვთავაზა მოგვეძებნა მერიის ბალანსზე არსებული შენობა-ნაგებობები და შესაბამისი სივრცის არსებობის შემთხვევაში შესაძლოა გადმოგვეცეს დროებით სარგებლობაში. ჩვენ უკვე გამოვითხოვეთ მერიისგან შენობა-ნაგებობების სია, რომელიც 10 სამუშაო დღეში მოგვეწოდება. ძალიან დაბალია შანსი იმისა, რომ მერიას ჰქონდეს ქალაქის ცენტრში შესაბამისი შენობა, სადაც შესაძლოა ჩვენი საქმიანობის გაგრძელება".

ნატა ქენქაძის თქმით, ახალ სივრცეში შესაბამისი სამუშაო პირობების შექმნა იქნება საჭირო და ეს თანხა სოციალურ საწარმოს არ გააჩნია. იგი ასევე ამბობს, რომ თუ მერია მათ მხარს არ დაუჭერთ, შესაძლოა, გენერატორი 9.8 უბრალოდ დაიკეტოს:

"ამ ვერსიის განხილვაც კი არ გვინდა გუნდის არცერთ წევრს. შესაძლოა crowdfunding კამპანიაც დავიწყოთ საჭირო თანხის შესაგროვებლად, სადაც საზოგადოების მხარდაჭერაც დაგვჭირდება".

გენერატორი 9.8 არის პირველი არაკომერციული, საერთო სამუშაო სივრცე და სოციალური ბარი საქართველოში, რომელსაც სოციალური საწარმოს ფორმა აქვს. გენერატორი 9.8 "მშვიდობისა და ინტეგრაციის საერთაშორისო ცენტრის" მიერ "სპორტისა და ახალგაზრდობის საქმეთა სამინისტროს" "ბავშვთა და ახალგაზრდობის განვითარების ფონდის" მხარდაჭერით დაარსდა.