იანვარში Sex and the City-ის გულშემატკივრებმა განსაკუთრებული ამბავი შეიტყვეს: სერიალი ახალი სეზონითა და ისტორიით დიდ ეკრანებს უბრუნდება! ყველასათვის საყვარელი საკულტო სერიალის ახალი სეზონი, სახელად And Just Like That… ძველთან ერთად, ახალ საინტერესო პერსონაჟებსაც შემოგვთავაზებს. მათ შორისაა სარა რამირესის პერსონაჟი — ჩე დიაზი. ჩე დიაზი სერიალში პირველი არაბინარული გენდერული იდენტობის მქონე პერსონაჟი იქნება. ჩე დიაზი stand-up კომიკოსია, რომელსაც სერიალში პოდკასტი მიჰყავს.

"And Just Like That…-ის მთელი გუნდი მოხარულია, რომ სარა რამირესის მსგავსი ნიჭიერი მსახიობი Sex and the City-ის ოჯახს შეუერთდება. სარა განსაკუთრებულად ნიჭიერია და თანაბრად ეხერხება კომედიასა და დრამაში თამაში, ამიტომ გვიხარია და შთაგონებულები ვართ შოუსთვის ამ ახალი პერსონაჟის შექმნის შესაძლებლობით", — ამბობს სერიალის პროდიუსერი მაიკლ პატრიკ კინგი.

სარა რამირესი მომღერალი, მსახიობი, სიმღერების ავტორი და აქტივისტია. მაყურებლებს თავი გრეის ანატომიასა და Madam Secretary-ში შესრულებული როლებით დაამახსოვრა. სწორედ გრეის ანატომიაში ბისექსუალი კალი ტორესის როლის შესრულების შემდეგ გაუმხილა საზოგადოებას, რომ არაბინარული გენდერული იდენტობის მქონეა. არაბინარული გენდერული იდენტობის მქონე ადამიანები საკუთარ თავს სქესის ბინარულ სისტემას, ქალსა და კაცს, არ მიაკუთვნებენ.

ახალ როლზე რამირესის დამტკიცება, გარკვეულწილად, შესაძლოა სერიალის ძველი ვარსკვლავის — კიმ კეტრელის სურვილსაც დავუკავშიროთ. კიმ კეტრელი, რომელიც სერიალში სამანტას განასახიერებდა, სამწუხაროდ, ახალ სეზონში არ დაბრუნდება, თუმცა მსახიობმა სურვილი გამოთქვა, რომ მის მაგივრად სერიალს ისეთი პერსონაჟი შემატებოდა, რომელიც And Just Like That…-ს უფრო ინკლუზიურს გახდიდა.

And Just Like That…-ის სიუჟეტი თანამედროვე დროში, კვლავ ნიუ-იორკში განვითარდება და 50 წელს გადაცილებული კერი ბრედშოუს, შარლოტ იორკისა და მირანდა ჰობის მეგობრობისა და სიყვარულის თავგადასავლებზე მოგვითხრობს. ახალ სეზონში მთავარ როლებს სარა ჯესიკა პარკერი, სინტია ნიქსონი და კრისტინ დევისი შეასრულებენ. სეზონში სულ ათი სერია შევა და თითოეულის ხანგრძლივობა ერთი საათი იქნება.

ამავე თემაზე: